Իտալիայում կասկածում են, որ Թրամփը կկարողանա դուրս բերել ԱՄՆ-ը ՆԱՏՕ-ից

Իտալիայի պաշտպանության նախարար Գուիդո Կրոզետտոն հայտարարել է, որ ԱՄՆ նախագահ Դոնալդ Թրամփը չի կարող ինքնուրույն որոշմամբ դուրս բերել երկիրը ՆԱՏՕ-ից։ Նրա խոսքով՝ նման քայլի համար անհրաժեշտ է Կոնգրեսի քվեարկություն, որի հաջողությունը կասկածի տակ է։

Միևնույն ժամանակ Կրոզետտոն չի բացառել, որ Թրամփը կարող է որոշել եվրոպական տարածքից դուրս բերել ամերիկյան զորախմբերը, ինչը, ըստ նրա, կթուլացնի Եվրոպայի անվտանգությունը։ Նա նշել է, որ ներկայում եվրոպական երկրները պատրաստ չեն լիարժեք փոխարինել ԱՄՆ-ին և գործել միասնական ուժով։

Իտալացի նախարարը նաև քննադատել է Իրանի դեմ իրականացված գործողությունը՝ այն անվանելով առանց միջազգային քննարկման և իրավական հիմքի սկսված։ Նրա կարծիքով՝ Թրամփի քաղաքականությունը պայմանավորված է արագ հաղթանակի ձգտմամբ՝ ներքաղաքական գործոնների, այդ թվում՝ առաջիկա ընտրությունների ազդեցությամբ։