ԱՄՆ-ն կտրուկ ավելացնում է Tomahawk հրթիռների գնումը․ Իրանում սպառված պաշարները ստիպել են աճը հասցնել 1200%-ի

ԱՄՆ ռազմածովային ուժերը նախատեսում են 2027 ֆինանսական տարվա համար շուրջ 1200 տոկոսով ավելացնել Tomahawk հրթիռների գնումը՝ Իրանում իրականացված «Epic Fury» ռազմական գործողության ընթացքում պաշարների սպառման ֆոնին։ Այս մասին հայտնում է Defense News-ը՝ ներկայացնելով ԱՄՆ ռազմածովային ուժերի բյուջետային հայտը Կոնգրեսին։

Ըստ հրապարակման՝ ՎՄՆ-ն խնդրել է ֆինանսավորում հատկացնել 785 Tomahawk հրթիռների ձեռքբերման համար՝ ավելի քան 3 միլիարդ դոլարի չափով, որի մեջ ներառված է նաև մոտ 1.5 միլիարդ դոլար արդիականացման ծախսերի համար։ Համեմատության համար նշվում է, որ 2026 թվականին Կոնգրեսը հաստատել էր ընդամենը 58 հրթիռի գնում՝ 257 միլիոն դոլար արժեքով։ Բացի այդ, 2027-ի բյուջեով նախատեսվում է ձեռք բերել նաև 494 AMRAAM միջին հեռահարության «օդ-օդ» դասի հրթիռ՝ շուրջ 800 միլիոն դոլարով։

Հաղորդվում է, որ ընդհանուր առմամբ ԱՄՆ ռազմածովային ուժերը նախատեսում են 2027 թվականին զենքի գնումների համար ծախսել ավելի քան 22 միլիարդ դոլար՝ գրեթե կրկնապատկելով նախորդ տարվա ցուցանիշը։ Միաժամանակ, The National Interest պարբերականը ավելի վաղ գրել էր, որ Իրանում գործողության առաջին 72 ժամում ԱՄՆ-ը սպառել է Tomahawk հրթիռների հնգամյա պաշարը, ինչը դարձել է գնումների կտրուկ աճի հիմնական պատճառը։