Porsche-ի վաճառքները կտրուկ նվազել են 2026 թվականի առաջին եռամսյակում

Գերմանական Porsche ավտոարտադրողի վաճառքները շարունակել են նվազել 2026 թվականի առաջին երեք ամիսներին՝ հատկապես Չինաստանում և ԱՄՆ-ում։ Այս մասին հայտնում է Reuters-ը։

Ընկերության տվյալներով՝ համաշխարհային առաքումները նվազել են 15 տոկոսով՝ կազմելով 60,991 ավտոմեքենա։ Չինաստանում անկումը հասել է 21 տոկոսի՝ տեղական արտադրողների հետ սուր մրցակցության պատճառով, իսկ Հյուսիսային Ամերիկայում վաճառքները նվազել են 10 տոկոսով՝ մասամբ էլեկտրամոբիլների հարկային արտոնությունների դադարեցման հետևանքով։

Միակ աճը գրանցվել է Գերմանիայում՝ 4 տոկոս, մինչդեռ Եվրոպայի մնացած հատվածում վաճառքները նվազել են 18 տոկոսով։ Ընկերությունը նաև հետաձգել է որոշ էլեկտրական մոդելների թողարկումը և կենտրոնացել ներքին այրման շարժիչներով մեքենաների վրա, իսկ նոր ղեկավարությունը խոստացել է վերականգնել դիրքերը՝ ծախսերի կրճատման և նոր մոդելների միջոցով։