ԱՄՆ Կոնգրեսում պահանջում են գնահատել Թրամփի հոգեկան վիճակը՝ աղմկահարույց հայտարարություններից հետո

ԱՄՆ Ներկայացուցիչների պալատի անդամ, դեմոկրատ Ջեյմի Ռասկինը կոչ է արել Սպիտակ տան բժշկին գնահատել նախագահ Դոնալդ Թրամփի կոգնիտիվ կարողությունները։ Այս մասին գրում է The Hill-ը՝ նշելով, որ պահանջի պատճառը նախագահի վերջին հայտարարություններն են, մասնավորապես՝ Իրանի վերաբերյալ։

Ռասկինը նամակով դիմել է Սպիտակ տան պաշտոնական բժշկին՝ Շոն Բարբաբելլային, որտեղ ընդգծել է, որ նախագահի խոսքերն ու գործողությունները լուրջ հարցեր են առաջացնում նրա հոգեկան վիճակի վերաբերյալ։ Նրա խոսքով՝ մասնագետները բազմիցս զգուշացրել են, որ Թրամփի մոտ կարող են նկատվել դեմենցիայի և կոգնիտիվ խանգարումների նշաններ։

Կոնգրեսականի պնդմամբ՝ վերջին օրերին նախագահի հրապարակային ելույթներն ավելի են անկապ, կտրուկ և երբեմն սպառնալի բնույթ ստացել։ Ավելի վաղ հոգեթերապևտ Ռուսլան Պանկրատովը ևս մեկնաբանել էր Թրամփի և Գերմանիայի կանցլեր Ֆրիդրիխ Մերցի մասնակցությամբ դրվագը՝ ուշադրություն հրավիրելով նախագահի վարքագծի վրա։