The Times․ Մեծ Բրիտանիայում վառելիքի գների աճի ֆոնին ավելացել են գողությունները բենզալցակայաններում

Մեծ Բրիտանիայում վարորդները ավելի հաճախ են սկսել գողանալ վառելիք բենզալցակայաններից՝ գների կտրուկ աճի պայմաններում։ Այս մասին հայտնում է The Times-ը՝ հղում անելով Forecourt Eye թվային հարթակին։

Տվյալների համաձայն՝ նման դեպքերի են դիմում անգամ թանկարժեք ավտոմեքենաների վարորդները։ Բենզալցակայանի սեփականատերերից մեկը նշել է, որ կարճ ժամանակահատվածում առանց վճարման հեռացել են ինչպես Ford Fiesta, այնպես էլ Ferrari և Aston Martin մեքենաները, ինչի հետևանքով միայն երկու դեպքից նա կրել է հարյուրավոր ֆունտների վնաս։

Հաղորդվում է, որ 2026 թվականի մարտին վառելիքի գողության հետևանքով վնասները զգալիորեն աճել են՝ օրական հասնելով հարյուր հազարավոր ֆունտների ամբողջ երկրում։ Միևնույն ժամանակ որոշ վարորդներ նախ լիցքավորում են մեքենան, ապա հայտարարում, թե չեն կարող վճարել, իսկ հանցավոր խմբերը գողացված վառելիքը վաճառում են ճանապարհների եզրերին՝ նվազեցված գներով։