WSJ․ Գերմանական ավտոհսկաները վերափոխվում են՝ անցնելով ռազմական արտադրության

Գերմանիայի խոշոր ավտոկոնցեռնները կարող են վերակողմնորոշվել դեպի սպառազինության արտադրություն՝ պահանջարկի նվազման և արդյունաբերական ճգնաժամի խորացման ֆոնին։ Այս մասին հայտնում է The Wall Street Journalը՝ հղում անելով պաշտոնական վիճակագրությանը։

Ըստ հրապարակման՝ Գերմանիան, որը երկար տարիներ եղել է եվրոպական արդյունաբերության շարժիչ ուժը, այժմ բախվում է երկարատև ստագնացիայի՝ Երկրորդ համաշխարհային պատերազմից ի վեր ամենախոր ճգնաժամերից մեկին։ Արտահանման մոդելի թուլացումը, Չինաստանի աճող մրցակցությունը և պահանջարկի անկումը ստիպում են երկրին վերանայել իր տնտեսական ռազմավարությունը՝ փորձելով արդյունաբերական անկումը փոխակերպել պաշտպանական աճի։

Մասնավորապես, Volkswagenը բանակցություններ է վարում Իսրայելի հետ՝ «Երկաթե գմբեթ» հակահրթիռային համակարգի բաղադրիչների արտադրության շուրջ, իսկ Schaefflerը արդեն սկսել է արտադրել անօդաչու սարքերի շարժիչներ, զրահամեքենաների համակարգեր և ռազմական ավիացիայի համար նախատեսված բաղադրիչներ։ Նշվում է նաև, որ ավտոարդյունաբերության ճգնաժամի պայմաններում ընկերությունները ստիպված են կրճատել արտադրությունը և վերակազմակերպել աշխատուժը։