Եվրահանձնաժողով․ ԵՄ-ն կանգնած է խոր բնակարանային ճգնաժամի առաջ

Եվրոպական միությունը գտնվում է լուրջ բնակարանային ճգնաժամի մեջ, և բնակչության մեծ մասը չի կարող իրեն թույլ տալ արժանապատիվ բնակարան։ Այս մասին հայտարարել է Դան Յորգենսենը՝ Բարսելոնայում անցկացված մամուլի ասուլիսի ընթացքում, հաղորդում է Եվրահանձնաժողովը։

Նրա խոսքով՝ բազմաթիվ քաղաքներում նույնիսկ միջին եկամուտ ունեցող քաղաքացիները՝ ուսուցիչներ, ոստիկաններ և բուժաշխատողներ, չեն կարողանում գտնել մատչելի և համապատասխան բնակարան։ Խնդիրը հատկապես սուր է երիտասարդների համար, որոնք չեն կարողանում սկսել ինքնուրույն կյանք՝ բնակարանի բարձր գների պատճառով։

Յորգենսենը նշել է, որ Եվրահանձնաժողովը արդեն աշխատում է իրավիճակի կարգավորման ուղղությամբ և պատրաստում է համաեվրոպական նախաձեռնություն, որը կներկայացվի մոտ ապագայում։ Ավելի վաղ տարբեր երկրներում ևս բարձրաձայնվել էր բնակարանային հասանելիության խնդիրը։