Ավարտվել է նախագահ Սերժ Սարգսյանի աշխատանքային այցը Բելգիա

Նախագահ Սերժ Սարգսյանը մարտի 14-ին Բելգիա կատարած աշխատանքային այցի շրջանակներում Բրյուսելում մասնակցել է Եվրոպական ժողովրդական կուսակցության (ԵԺԿ) գագաթնաժողովին, որտեղ քննարկվել են Եվրոպայի քաղաքական իրավիճակին, ԵՄ ֆինանսատնտեսական հիմնահարցերի կարգավորմանը, ինչպես նաև Արևելյան գործընկերության շրջանակներում համագործակցության հեռանկարներին վերաբերող խնդիրներ:

Գագաթնաժողովում Սերժ Սարգսյանը հանդես է եկել ելույթով, որում անդրադարձել է ս.թ. փետրվարի 18-ին կայացած ՀՀ նախագահի ընտրություններին, հետընտրական զարգացումներին, ՀՀ-ում իրականացվող բարեփոխումների ընթացքին, ինչպես նաև Արևելյան գործընկերության շրջանակներում փոխգործակցությանն ու առաջիկա անելիքներին: Ելույթում Հանրապետության ղեկավարը վերահաստատել է, որ Հայաստանը վճռական է շարունակելու համապարփակ բարեփոխումների քաղաքական ուղեգիծը, ինչպես նաև եվրոպական ինտեգրումը՝ որպես Հայաստանի արտաքին քաղաքականության առաջնահերթություն: Խոսելով Արևելյան գործընկերության որոշ երկրների կողմից եվրոպական արժեքների և գործընկերության նպատակների ոտնահարման դեպքերից՝ Նախագահ Սարգսյանը նշել է, որ անընդունելի է Ադրբեջանի կողմից այդ արժեքներն ընտրողաբար կիրառելը:

Հանրապետության ղեկավարը գագաթնաժողովից հետո հանդիպում է ունեցել ԵԺԿ նախագահ Վիլֆրիդ Մարտենսի հետ:

Սերժ Սարգսյանը հանդիպման սկզբում շնորհակալություն է հայտնել ՀՀ նախագահի ընտրությունների ընթացքում անձամբ Վիլֆրիդ Մարտենսի և ԵԺԿ ամբողջ ընտանիքի աջակցության համար, ինչպես նաև ընտրություններից հետո նրա ջերմ շնորհավորական ուղերձի, դրանում Հայաստանի առաջընթացի մասին տեղ գտած դրական գնահատականների համար:

Կողմերը կարևորել են նաև միջկուսակցական համագործակցության հետագա խորացումը, այդ թվում' միջխորհրդարանական մարմինների շրջանակներում:

Հանդիպման ընթացքում անդրադարձ է եղել տարածաշրջանային խնդիրներին: