ՀՀ փոխվարչապետը հանդիպումներ ունեցավ Քաթարում

Քաթարի Պետություն աշխատանքային այցի շրջանակում ՀՀ փոխվարչապետ, հայ-քաթարական միջկառավարական համատեղ հանձնաժողովի համանախագահ Արմեն Գեւորգյանն այսօր Դոհայում հանդիպեց Քաթարի Պետության վարչապետ, արտաքին գործերի նախարար շեյխ Համադ բին Ջաբեր ալ Թանիի հետ:

Քննարկվեցին երկու երկրների միջեւ տարբեր ոլորտներում համագործակցության զարգացման եւ, հատկապես, տնտեսական կապերի ամրապնդմանն առնչվող հարցեր: Հանդիպմանը նշվեց, որ թե հայկական, թե քաթարական կողմը շահագրգռված են հարաբերությունների խորացմամբ:

Զրուցակիցներն անդրադարձան միջկառավարական հանձնաժողովի գործունեության հարցերին, անհրաժեշտ համարեցին այս տարվա ընթացքում հանձնաժողովի առաջին նիստի անցկացումը՝ նկատելով, որ այն նոր ազդակ կհաղորդի երկկողմ առեւտրատնտեսական կապերի զարգացմանը եւ արդյունավետ փոխգործակցության հիմք կստեղծի: Քննարկվեցին հանձնաժողովի նիստի անցկացման հնարավորություններն ու ժամկետները: Նշվեց, որ կողմերն արդեն համաձայնեցրել են տարբեր ոլորտներում փոխգործակցությանը վերաբերող շուրջ մեկ տասնյակ միջպետական փաստաթղթեր, որոնց ստորագրումն էապես կնպաստի երկկողմ կապերի ակտիվացմանը:

Կարեւորվեց նաեւ գործարար շփումների աշխուժացումը, երկու երկրներում կազմակերպվող միջազգային գործարար համաժողովներին, ցուցահանդեսին գործարարների մասնակցության խրախուսումը: Երկկողմ հարաբերությունների զարգացման տեսանկյունից կողմերն ընդգծեցին Հայաստանի եւ Քաթարի միջեւ ուղիղ օդային հաղորդակցության հաստատման անհրաժեշտությունը:

Փոխվարչապետը տեղեկություններ ներկայացրեց Հայաստանում իրականացվող տարածաշրջանային նշանակության ծրագրերի մասին՝ նկատելով, որ հատկապես առեւտրատնտեսական ու ներդրումային ոլորտներում առկա է փոխգործակցության մեծ ներուժ: Քաթարի վարչապետը նույնպես ընդգծեց, որ իր երկիրը հետաքրքրված է Հայաստանում ներդրումներ կատարելու եւ փոխշահավետ ծրագրերի իրականացմանը մասնակցելու հնարավորություններով:

Փոխվարչապետ Ա. Գեւորգյանի մյուս հանդիպումը Քաթարի մունիցիպալ գործերի եւ քաղաքային պլանավորման նախարար Աբդուլռահման բին Խալիֆա ալ Թանիի հետ էր:

Զրուցակիցները քննարկեցին համագործակցության հարցեր՝ ընդգծելով, որ առկա է փոխգործակցության մեծ ներուժ: Կողմերն առանձնահատուկ ընդգծեցին, որ միջկառավարական հանձնաժողովի գործունեության ակտիվացումն էապես կնպաստի առեւտրատնտեսական կապերի զարգացմանը: Երկուստեք կարեւորվեց հանձնաժողովի նիստի օրակարգում ոլորտային համագործակցության հարցերի ընդգրկումը:

Անդրադառնալով գործակցության կոնկրետ ուղղություններին՝ զրուցակիցները հեռանկարային համարեցին գյուղատնտեսության, գյուղմթերքի արտահանման, քաղաքաշինության ոլորտներում համագործակցությունը: Նշվեց, որ քաթարական կողմը ողջունում է շինարարության ոլորտում հայ մասնագետների ներգրավումը՝ հաշվի առնելով նրանց փորձն ու հմտությունները, ինչպես նաեւ պատրաստ է ուսումնասիրել հայկական շինանյութի, մասնավորապես, քարի ներկրման հնարավորությունները: Քննարկվեց նաեւ Հայաստանի ոլորտային բուհերում քաթարցի ուսանողների պատրաստման հարցը, պայմանավորվածություն ձեռք բերվեց հարցի կապակցությամբ քննարկումները հետագայում շարունակել:

Կողմերն առանձնահատուկ կարեւորեցին երկու երկրների միջեւ ապակենտրոնացված մակարդակով համագործակցության ձեւավորման ուղղությամբ աշխատանքների իրականացումը: Նշվեց, որ արդեն պատրաստ է Երեւանի եւ Դոհայի միջեւ համագործակցության մասին համաձայնագիրը, որն առաջիկայում կներկայացվի կողմերի ստորագրմանը: