Ա. Գևորգյանն ընդունեց Կատարի դեսպանին

ՀՀ փոխվարչապետի, տարածքային կառավարման նախարարի պաշտոնակատար, ՀՀ կառավարության եւ Կատարի Պետության կառավարության միջեւ տնտեսական համագործակցության համատեղ հանձնաժողովի համանախագահ Արմեն Գեւորգյանն այսօր ընդունեց ՀՀ-ում Կատարի Պետության արտակարգ եւ լիազոր դեսպան Իբրահիմ Ա. Ռահման ալ-Մեղայիսիբին (նստավայրը՝ Թեհրան): Հանդիպմանը ներկա էր ՀՀ ԿԱ քաղաքացիական ավիացիայի գլխավոր վարչության պետ Արտյոմ Մովսեսյանը:

Հանդիպմանը քննարկվեցին երկկողմ առեւտրատնտեսական կապերի ակտիվացման, համագործակցության ընդլայնման հարցեր: Մասնավորապես, անդրադարձ կատարվեց հայ-կատարական միջկառավարական հանձնաժողովի առաջին նիստի նախապատրաստական աշխատանքներին: Պայմանավորվածություն ձեռք բերվեց՝ հանձնաժողովի նիստն անցկացնել այս տարվա հունիսին՝ Երեւանում, որոշվեց աշխատանքներ տանել՝ նիստի օրակարգը սեղմ ժամկետներում ձեւավորելու ուղղությամբ:

Զրուցակիցները պատրաստակամություն հայտնեցին աջակցություն ցուցաբերել փոխշահավետ ծրագրերի իրականացման նախաձեռնություններին՝ որպես համագործակցության զարգացման արդյունավետ հարթակ դիտարկելով միջկառավարական հանձնաժողովը:

Ա. Գեւորգյանը կարեւորեց Հայաստան կատարական ներդրումների ներգրավման հարցը՝ հեռանկարային համարելով համագործակցությունը գյուղատնտեսության, արդյունաբերության, զբոսաշրջության, գիտակրթական բնագավառներում: Կատարի դեսպանը տեղեկացրեց, որ սոցիալական հարցերի ոլորտում համագործակցության հարցերի քննարկման նպատակով մայիսի երկրորդ կեսին նախատեսվում է Կատարի աշխատանքի նախարարության պատվիրակության այցը Հայաստան:

Հանդիպմանը նաեւ պայմանավորվածություն ձեռք բերվեց, որ օդային հաղորդակցության ոլորտում համագործակցության հարցեր քննարկելու նպատակով հունիսին Հայաստան կայցելի Կատարի քաղավիացիայի պատվիրակությունը: Ա. Գեւորգյանը նշեց, որ աշխարհի առաջատարներից համարվող կատարական "Qatar Airways" ավիաընկերության մուտքը հայկական շուկա կնպաստի ուղեւորափոխադրումների որակի եւ այս ոլորտում մրցակցության բարձրացմանը:

Զրուցակիցներն անդրադարձան երկու երկրներում դեսպանատների բացման հնարավորությանը եւ ընդգծեցին, որ այն կարող է նպաստել փոխգործակցության արդյունավետությանը: