ՀՀ փոխվարչապետը հանդիպեց ՄԱԿ-ի գլխավոր քարտուղարի տեղակալի հետ

ՀՀ փոխվարչապետ, տարածքային կառավարման նախարար Արմեն Գեւորգյանը մայիսի 10-ին Նյու Յորքում հանդիպում ունեցավ ՄԱԿ-ի Գլխավոր քարտուղարի տեղակալ Ռեբեկա Գրինսպանի հետ: Կողմերն բարձր ու արդյունավետ գնահատեցին Հայաստանում ՄԱԿ-ի տարբեր գործակալությունների եւ, մասնավորապես, ՄԱԿ-ի Զարգացման ծրագրի (ՄԱԶԾ) հետ ավելի քան 20-ամյա համագործակցությունը:

Փոխվարչապետը նշեց, որ ՄԱԶԾ-ին համարում է զարգացման կարեւոր գործընկեր, վերջինիս միջոցով Հայաստանում իրականացվող ծրագրերը համահունչ են ՀՀ կառավարության որդեգրած քաղաքականությանը, մասնավորապես՝ հազարամյակի զարգացման նպատակներին հասնելու գործընթացում:

Փոխվարչապետն առանձնահատուկ նշեց ՄԱԿ երեւանյան գրասենյակի օժանդակությամբ ու փորձագիտական աջակցությամբ Հայաստանում տարածքների համաչափ զարգացման խնդիրների ուսումնասիրման ուղղությամբ կատարվող աշխատանքները, ինչպես նաեւ տարբեր համայնքներում իրականացվող զարգացման բազմաբնույթ ծրագրերը: Առանձնակի անդրադարձ կատարվեց Եվրոպական միության նախաձեռնած Հարավային Կովկասում սահմանների համալիր կառավարման ծրագրին, որը միտված է տարածաշրջանային համագործակցության խթանմանը եւ հաղորդակցության ուղիների բարելավմանը:

Կողմերը քննարկեցին նաեւ հետագա համագործակցությանն առնչվող հարցեր: Փոխվարչապետը հայկական կողմի մտահոգությունը հայտնեց ՄԱԶԾ Բրատիսլավայի տարածաշրջանային գրասենյակի աշխատանքի ավարտի կապակցությամբ՝ նկատելով, որ գրասենյակի փոխարինման եւ տեղափոխման առնչությամբ համատեղ նամակով ՄԱԿ-ի գլխավոր քարտուղարին են դիմել նաեւ հայաստանյան բազմաթիվ հասարակական կազմակերպություններ:

Հաշվի առնելով հայկական կողմի մոտեցումները՝ Ռեբեկա Գրինսպանը տեղեկացրեց, որ Նյու Յորքում պատրաստ են քննարկել Երեւանի հետ համագործակցության ապագա ձեւաչափին վերաբերվող հարցեր՝ ընդունելի լուծումներ գտնելու նպատակով:

Նույն օրը երեկոյան փոխվարչապետը մասնակցեց նյույորքաբնակ ազգային բարերար Նազար Նազարյանի մեծարման երեկոյին եւ ներկայացրեց ՀՀ նախագահի շնորհավորական ուղերձը: Միջոցառման ընթացքում ՆՍՕՏՏ Գարեգին Բ Ամենայն հայոց կաթողիկոսը բարերարին հանձնեց «Ասպետ Սուրբ Էջմիածնի» հայրապետական շքանշանը:

Ա. Գեւորգյանը մասնակցեց նաեւ "Էլիզ կղզու պատվո շքանշան"-ի հանձնման ամենամյա արարողությանը, որի ընթացքում պարգեւատրվեցին ԱՄՆ-ի հասարակական կյանքում, ինչպես նաեւ հայ համայնքում եւ հայրենիքում իրենց գործունեությամբ աչքի ընկած ամերիկահայեր:

ՀՀ փոխվարչապետ, Հայաստանում մարդկանց շահագործման (թրաֆիքինգի) հարցերով խորհրդի նախագահ Արմեն Գեւորգյանի գլխավորած պատվիրակությունը այսօր՝ մայիսի 13-ին կմասնակցի Նյու Յորքում մեկնարկող ՄԱԿ-ի Գլխավոր ասամբլեայի թրաֆիքինգի հարցերով բարձր մակարդակի հանդիպման նիստին: Փոխվարչապետը նիստի ընթացքում հանդես կգա ելույթով: Բոլոր հանդիպումներին փոխվարչապետին ուղեկցում է ՄԱԿ-ում ՀՀ դեսպան Կարեն Նազարյանը: