Համագործակցության նոր հեռանկարներ

Այսօր ՀՀ ԱԻ նախարարություն էր այցելել Երևանում Չեխիայի դեսպանատան գործերի ժամանակավոր հավատարմատար Պետր Միկիսկան: Նրան ընդունել է ՀՀ ԱԻ նախարարի տեղակալ Հայկարամ Մխիթարյանը:

Այցի հիմնական նպատակն էր քննարկել ՀՀ արտակարգ իրավիճակների և Չեխիայի ներքին գործերի նախարարությունների միջև համագործակցության հուշագրի կնքման հետ կապված հարցերը:

Ողջունելով հյուրին, փոխնախարար Հ. Մխիթարյանը մասնավորապես ասաց, որ ԱԻ նախարարությունը լայն համագործակցություն ունի տարբեր երկրների ու միջազգային գրեթե բոլոր մարդասիրական կազմակերպությունների հետ, և պատրաստ է համագործակցության նոր գործընկերների հետ:

Չեխիայի դեսպանատան գործերի ժամանակավոր հավատարմատար Պետր Միկիսկան նշեց, որ այս բնագավառում միջազգային համագործակցությունը շատ կարևոր նշանակություն ունի, իսկ այն հանգամանքը, որ Հայաստանում աղետների կառավարման հետ առնչվող բոլոր կառույցները հավաքված են մեկ տանիքի տակ, ավելի դյուրին և արդյունավետ է դարձնում փոխգործակցությունը:

Փոխգործակցության եզրեր գտնելու ուղղությամբ քայլեր արվել են դեռևս երկու տարի առաջ, սակայն նախարարությունների միջև հուշագրի ստորագրումն առավել գործնական կդարձնի աղետների կառավարման ոլորտում համագործակցությունը և նոր հեռանկարներ կբացի: