Փոխվարչապետն ու Իտալիայի դեսպանը քննարկել են ապակենտրոնացված փոխգործակցության հեռանկարները

ՀՀ փոխվարչապետ, տարածքային կառավարման նախարար Արմեն Գեւորգյանն այսօր ընդունել է Հայաստանի Հանրապետությունում Իտալիայի Հանրապետության նորանշանակ արտակարգ եւ լիազոր դեսպան Ջովաննի Ռիչուլիին: ՀՀ տարածքային կառավարման նախարարության հասարակայնության հետ կապերի բաժնից տեղեկացնում են, որ փոխվարչապետը շնորհավորել է դիվանագետին' պաշտոնն ստանձնելու կապակցությամբ եւ հաջողություններ մաղթել հ ետագա գործունեության մեջ` վստահություն հայտնելով, որ դեսպանն իր ներդրումը կունենա երկու բարեկամ երկրների հարաբերությունների ամրապնդման գործում:

Զրուցակիցներն անդրադարձել են ապակենտրոնացված մակարդակով փոխգործակցության խորացման հարցերին: Երկուստեք դրական է գնահատվել Հայաստանի եւ Իտալիայի տարբեր քաղաքների, մարզերի ու նահանգների միջեւ գործընկերային կապերի հաստատման գործընթացը: Նշվել է, որ վերջերս բարեկամության եւ համագործակցության հուշագիր է ստորագրվել Գյումրի եւ Նարդո քաղաքների միջեւ, սկիզբ է դրվել նաեւ Նարդո եւ Աշտարակ քաղաքների միջեւ գործակցությանը։

Կողմերը քննարկել են ապակենտրոնացված մակարդակով փոխգործակցության ընդլայնման հնարավորությունները' արձանագրելով, որ առկա է նման ձեւաչափով գործընկերային կապերի զարգացման մեծ ներուժ:

Դեսպանը պատրաստակամություն է հայտնել աջակցելու երկկողմ շփումների խորացմանն ուղղված բոլոր նախաձեռնություններին: