ԵՄ-ն հայտարարում է Հարևանության ծրագրի շրջանակում նոր համագործակցության մասին

Եվրոպական հանձնաժողովն ու Եվրոպական հեռարձակողների միությունը (EBU) հայտարարել են համատեղ համագործակցության մասին, որի նպատակն է ավելի ամրապնդել անկախ ԶԼՄ-ների դերը Եվրոպական հարևանության ծրագրում ընդգրկված երկրներում:

«Արմենպրես»-ի փոխանցմամբ, համագործակցության մեկնարկի վերաբերյալ համաձայնագիրը ստորագրել են Եվրամիության ընդլայնման հարցերով հանձնակատար Շտեֆան Ֆյուլեն, Եվրոպական հեռարձակողների միության նախագահ Ժան Պոլ Ֆիլիպոտն ու գործադիր տնօրեն Ինգրիդ Դելտենրեն:

«Ազատ խոսքի իրավունքն ու արտահայտումը, ազատ մամուլն ու զանգվածային տեղեկատվությունը ժողովրդավարության հիմնաքարերից են: Հենց դա էլ Եվրոպական հարևանության քաղաքականության հիմնական նպատակներից մեկն է: Շատ ուրախ եմ, որ Եվրոպական հեռարձակողների միությունը կիսում է մեր տեսակետը, որ ազատ արտահայտության հնարավորության ապահովումը պահանջում է մեծ ջանքեր բոլոր շահառուների կողից»,- նշել է Ֆյուլեն: Եվրոպական հեռարձակողների միության նախագահի գնահատմամբ էլ, ծրագիրն ավելի ուժեղ է և կայուն, քանի որ ստանալու է նաև Եվրահանձնաժողովի աջակց ությունը: Ծրագրի շրջանակներում նախատեսվում է տեխնիկական աջակցություն, կրթական մակարդակի բարձրացում և այլն:

Եվրոպական հարևանության ծրագրի շրջանակնում ընդգրկված է 16 պետություն՝ Ալժիր, Եգիպտոս, Իսրայել, Հորդանան, Լիբանան, Լիբիա, Մարոկո, Սիրիա, Թունիս, Պաղեստին: Հետաքրքրական է, որ ծրագրում ընդգրկված Պաղեստինին ԵՄ-ն չի համարում որպես պետություն: Եվրոպական հարևանության ծրագրում ընդգրկված են նաև Նախկին խորհրդային 6 հանրապետությունները՝ Հայաստանը, Վրաստանը, Ադրբեջանը, Ուկրաինան, Մոլդովան և Բելառուսը: