ԵԱՀԿ Մինսկի խմբի համանախագահները համատեղ հայտարարություն են տարածել

Տարածաշրջան կատարած հերթական այցից հետո ԵԱՀԿ Մինսկի խմբի համանախագահները համատեղ հայտարարություն են տարածել: Այս մասին հայտնել է APA գործակալությունը՝ վկայակոչելով ԵԱՀԿ պաշտոնական կայքի հաղորդագրությունը:

Համանախագահներ Իգոր Պոպովը (Ռուսաստան) և Պիեր Անդրյուն (Ֆրանսիա) այց են կատարել տարածաշրջան կառավարության պաշտոնական անձանց հետ հանդիպման և մոնիթորինգում մասնակցելու համար:

ԱՄՆ համանախագահ Ջեյմս Ուորլիքն անձնական խնդիրների պատճառով տարածաշրջանային այցին չի մասնակցել, թեպետ հանդիպումներում Միացյալ Նահանգների ներկայությունն ապահովված է եղել:

Բաքվում և Երևանում համանախագահները հանդիպել են երկու պետության նախագահներ, համապատասխանաբար, Իլհամ Ալիևի և Սերժ Սարգսյանի հետ: Հանդիպումների ժամանակ քննարկվել են այս ամիս Փարիզում կայանալիք նախագահների գագաթնաժողովի նախապատրաստությունները՝ երկրի նախագահ Ֆրանսուա Օլանդի հրավերով:

Հիշատակելով Սոչիում և Ուելսում Հայաստանի ու Ադրբեջանի նախագահների վերջին հանդիպումները՝ համանախագահները նշել են, որ սահմանային շրջանում ու շփման գծում ամռանն առկա լարվածությունը կայունացել է: Նրանք հույս են հայտնել, որ հրադադարի խախտման վերջին դեպքերը չեն լարի իրավիճակը:

Նախագահների հետ հանդիպումներից բացի, ԵԱՀԿ ՄԽ համանախագահները դիտորդական առաքելություն են իրականացրել հայ-ադրբեջանական սահմանին: Երկու կողմում էլ նրանք հանդիպել են տեղի պաշտոնյաների և հրամանատարների հետ անվտանգության պայմանների վերաբերյալ կարճ տեղեկություն ստանալու համար: Համանախագահները կոչ են արել կողմերին քայլեր ձեռնարկել լարվածության թոթափման և մասնավորապես քաղաքացիական բնակչության նկատմամբ բռնությունից խուսափելու համար: