Նախարար Օհանյանն Ադրբեջանին խորհուրդ տվեց վերհիշել անցյալն ու արկածախնդրության չդիմել

ՀՀ պաշտպանության նախարար Սեյրան Օհանյանը վստահ է, որ մեր հարևան պետությունը' Ադրբեջանը, ոչ հիշում է իր պատմությունը, ոչ էլ անցյալից դասեր քաղում և սխալներից սովորում: Նախարարը վստահեցնում է, որ հակառակ պարագայում նրանք չէին դիմի ողջ տարածաշրջանի անվտանգությունը վտանգող և այս փխրուն խաղաղությունը պահպանելու միջազգային հանրության բոլոր ջանքերն ի չիք դարձնող հուլիս-օգոստոսյան աննախադեպ արկածախնդրությանը:

«Այդ արկածախնդրությունը փշրվեց' հանդիպելով հայկական բանակի աներեր կեցվածքին և մի գիշեր անհրաժեշտ եղավ, որ հօդս ցնդեր հակառակորդի բանակի մասին տարիներով հյուսված էժանագին առասպելը: Ցավոք, դա էլ դաս չեղավ և հակառակորդը լարվածությունը տեղափոխեց որակապես նոր հարթություն: Ինչպես ժամանակին քնած սպա էր կացնահարում և մարդասպանին հերոսացնում, այժմ էլ խոցեց զորավարժարանում առանց սպառազինության ուսումնավարժական թռիչք կատարող ուղղաթիռը և ամեն կերպ խաթարում է ուղղաթիռի օդաչուների աճյունները միջդիրքային տարածությունից դուրս բերելու բոլոր ջանքերը: Ակնհայտ է, որ դիմացինը չի հասկանում իր կատարածի բնույթն ու հետևանքները, ինչը պարտադրում է ամեն րոպե զգոն լինել: Մեզ նույնն են պարտարում նաև այստեղ հանգչող հերոսները: Նրանք մեզ զրկել են սխալվելու իրավունքից»,- «Արմենպրես»-ի փոխանցմամբ' նոյեմբերի 20-ին Եռաբլուրում ասաց նախարարը' հավելելով, որ իրականությունը չես փոխի, և «մենք դատապարտված ենք ունենալ մի հարևան, որը չի հասկանում պետությունների և ժողովուրդների միջև երկխոսություն սկսելու մարդկային լեզուն ու չի կարողանում բուժվել նավթադոլարային հիստերիայից»:

Նախարարի գնահատմամբ, Ադրբեջանը փորձում է խոսել ուժի դիրքերից' չհասկանալով, որ այդ դիրքերն ինքը վաղուց է հանձնել, քանի որ ՀՀ ԶՈՒ-ն ուժի լեզուն իրենցից լավ գիտի: