Մոսկվայում աշխատանքն է սկսել հետխորհրդային պետությունների երիտասարդ լրագրողների դպրոցը

«Ռոսիյա սեգոդնյա» միջազգային լրատվական գործակալության բազայի վրա նոյեմբերի 27-ին Մոսկվայում աշխատանքն է սկսել ժուռնալիստիկայի դպրոցը, որը նախատեսված է հետխորհրդային պետությունների Երիտասարդ լրագրողների համար:

Նախագծի նպատակն է՝ աջակցել ԱՊՀ-ի երկրների, Վրաստանի և բալթյան երկրների ԶԼՄ-ների երիտասարդ ներկայացուցիչների մասնագիտական մակարդակի բարձրացմանը, ինչպես նաև հետխորհրդային երկրների միջև տեղեկատվական փոխգործակցությանը, հաղորդում է «Արմենպրես»-ը:

Դպրոցի աշխատանքին մասնակցում են Հայաստանից, Ադրբեջանից, Բելառուսից, Վրաստանից, Ղազախստանից, Ղրղզստանից, Լատվիայից, Լիտվայից, Մոլդովայից, Տաջիկստանից, Ուզբեկստանից, Ուկրաինայից և Էստոնիայից ժամանած լրագրողներ:

Երկու օրվա ընթացքում ռուս հայտնի լրագրողները կանցկացնեն մասնագիտական թրենինգներ և վարպետության դասեր: Դպրոցի շրջանակներում հատուկ ուշադրություն կհատկացվի «Մեդիան գլոբալ ճգնաժամերի պայմաններում» հրատապ թեմային: «Ռուսաստանը գլոբալ քաղաքականության մեջ» հանդեսի գլխավոր խմբագիր Ֆյոդոր Լուկյանովը դասախոսություն կկարդա «Հետխորհրդային տարածքն արդի աշխարհաքաղաքական գործընթացների համակարգում» թեմայով:

Դպրոցի աշխատանքի ընթացքում կամփոփվեն Անդրկովկասի երկրների երիտասարդ ժուռնալիստների շրջանում անցկացված լրագրողական էսսեի մրցույթի արդյունքները և մրցանակներ կհանձնվեն հաղթղղներին:

Նախագիծը «Հյուսիս-Հարավ» ռուսական քաղաքական կենտրոնը կազմակերպել է «Ռոսիյա սեգոդնյա» գործակալության բազայի վրա՝ ԱՊՀ-ի մասնակից պետությունների հումանիտար համագործակցության միջպետական հիմնադրամի աջակցությամբ, հաղորդել է ՌԻԱ Նովոստին: