Լավրովը չի բացառել հայկական կողմի հետ դիվերսանտ Դիլգամ Ասքերովի հարցի քննարկումը

Ռուսաստանի Դաշնությունը հայկական կողմի հետ կքննարկի 2014 թվականի ամռանը Լեռնային Ղարաբաղի Հանրապետության զինված ուժերի կողմից ձերբակալված դիվերսանտ Դիլգամ Ասքերովի հարցը: Ինչպես հաղորդում է «Արմենպրես»-ը' վկայակոչելով ռուսական «ՏԱՍՍ» գործակալությունը, այս մասին մամուլի ասուլիսի ժամանակ, պատասխանելով ադրբեջանցի լրագրողի հարցին, ասել է ՌԴ արտաքին գործերի նախարար Սերգեյ Լավրովը:

Նա նշել, որ Ռուսաստանն ուշադրությամբ հետևում է տարբեր երկրներում ձերբակալված ռուսաստանցիների ճակատագրին: ՌԴ արտգործնախարարի հավաստմամբ' Ռուսաստանը տվյալ երկրների հետ գոյություն ունեցող երկկողմ հարաբերությունների շրջանակներում առկա միջոցներով կայացնում է համապատասխան որոշումներն իր ձերբակալված քաղաքացիների վերաբերյալ' հաշվի առնելով նաև ձերբակալությունների պատճառը, մեղադրանքի ծանրությունը, ինչպես նաև նրանց կալանքի պայմանները: «Ինչ վերաբերում է ադրբեջանական ծագում ունեցող՝ Ռուսաստանի քաղաքացուն, որին ձերբակալել է հայկական կողմը, մենք այդ հարցը կքննարկենք հայկական կողմի հետ»,- նշել է Լավրովը:

ԼՂՀ պաշտպանության նախարարության, ԼՂՀ ազգային անվտանգության ծառայության և ԼՂՀ ոստիկանության համապատասխան ստորաբաժանումների կողմից 2014 թվականի հուլիսի 11-ին ձեռնարկված օպերատիվ-հետախուզական միջոցառումների արդյունքում ԼՂՀ Շահումյանի շրջանի տարածքում հայտնաբերվել և ձերբակալվել են պետական սահմանն ապօրինաբար հատած Ադրբեջանի Հանրապետության քաղաքացիներ Շահբազ Ջալալ օղլը Գուլիևը (ծնվ.1968թ.) և Դիլհամ Գարդաշխան օղլը Ասքերովը (ծնվ. 1960թ.), ևս մեկ դիվերսանտ' Ադրբեջանի քաղաքացի Հասան Հասանովը (ծնվ.1978թ.) դիմադրություն ցույց տալու պատճառով ոչնչացվել է: Դիլհամ Ասկերովը դատապարտվել է ցմահ, իսկ Շահբազ Գուլիևը՝ 22 տարվա ազատազրկման՝ լրտեսության, առանց պատշաճ թույլտվության Լեռնային Ղարաբաղի պետական սահմանը հատելու, ապօրինի կերպով հրազեն և ռազմամթերք կրելու, մարդուն բացահայտ առևանգելու և սպանության համար։