«Եթե հակառակորդը նույնիսկ դիմի նման ծայրահեղ քայլերի, ապա Արցախի դրոշը կծածանվի Ադրբեջանի մայրաքաղաքում»

Սահմանին իրավիճակը վերահսկելի է, հակառակորդի դիվերսիոն փորձերը հայկական զինված ուժերը կասեցնում են և շարունակում պահպանել փխրուն խաղաղությունը:

«Թշնամին իրավիճակի ապակայունացման փորձեր է անում, սակայն նրա ցանկացած փորձ կասեցվում է, թշնամին, հաշվի առելով քաղաքական իրավիճակի բարդացումը, սահմանին գործընթացներ է կատարում, ժողովրդի ուշադրությունը շեղելու համար հատուկ ակտիվություն է ցուցաբերում սահմանի երկայնքով: Բացի այդ, 2015թ. հայության համար կարևոր տարի է: Ցեղասպանության 100-րդ տարելիցին նրանք էլ յուրովի են ցանկանում մասնակցել: Սա ցեղասպան քաղաքականության շարունակությունն է»,- «Արմենպրես»-ի հետ զրույցում ասաց ԼՂՀ նախագահի մամուլի խոսնակ Դավիթ Բաբայանը:

Հունվարյան լարվածությունն, ըստ Բաբայանի, նաև խորհրդանշական է: «Նախ հունվարյան տոներն են' Նոր տարի, Սուրբ ծնունդ, հետո Բաքվի հայերի ջարդերի տարելիցն է, և թշնամին այս կերպ է «շնորհավորում»' դիմելով ամենակեղտոտ և անբարոյական քայլերին: Սա բնորոշ է տոտալիտար, ֆաշիստական պետություններին, և այսպիսի ագրեսիա Ադրբեջանը ոչ միայն արտաքին, այլև ներքին ասպարեզում է ցույց տալիս' հետապնդելով ընդդիմադիր գործիչներին, մարդու իրավունքի պաշտպաններին, ազատ կամք արտահայտողներին, բոլորին, ովքեր կարծիք են հայտնում իշխանության հասցեին: Սա բնորոշ է ֆաշիստական պետությանը»,- ասաց Բաբայանը:

ԼՂՀ նախագահի մամուլի խոսնակը շեշտում է, որ հունվարյան աննախադեպ լարվածության առնչությամբ տեղյակ են պահել միջազային կազմակերպություններին: ԵԱՀԿ գործող նախագահի անձնական ներկայացուցիչ դեսպան Անջեյ Կասպրշիկի հետ հանդիպմանը ԼՂՀ նախագահ Բակո Սահակյանը ներկայացրել է սահմանային իրավիճակը:

«Իրենք էլ են մտահոգված այս վիճակով: Ներկա դրությամբ միակ գործոնը, որ զսպում է ագրեսորին, ԼՂՀ պաշտպանության բանակն է: Ագրեսորը միշտ պետք է իմանա, որ մենք ավելի ուժեղ ենք, եթե նա այդ զգացումը կորցրեց, ապա կդիմի ավելի անկանխատեսելի քայլերի: Սակայն, եթե նույնիսկ դիմի նման ծայրահեղ քայլերի, ապա Արցախի դրոշը կծածանվի Ադրբեջանի մայրաքաղաքում, այլ տարբերակ չկա»,- ասաց Բաբայանը:

Իրավիճակը հայ-ադրբեջանական և ադրբեջանա-ղարաբաղյան սահմանին հունվարի սկզբից լարված է: Հակառակորդը խախտում է հրադադարի ռեժիմն ու միաժամանակ տարբեր ուղղություններով դիվերսիոն խմբեր ուղարկում Հայաստանի ուղղությամբ: Դիվերսիոն բազմաթիվ փորձեր հայկական զինված ուժերը կասեցրել են: