Թուրքիան Վրաստանի թիվ մեկ առևտրային գործընկերն է. Ղարիբաշվիլի

Վրաստանի վարչապետ Իրակլի Ղարիբաշվիլին Դավոսում Համաշխարհային տնտեսական ֆորումի շրջանակներում հանդիպել է իր թուրք գործընկեր Ահմեդ Դավութօղլուի հետ: Այս մասին հայտնել է «Նովոստի Գրուզիան»՝ հղում անելով Վրաստանի կառավարության մամուլի ծառայությանը:

Հանդիպման ընթացքում կողմերը քննարկել են երկու երկրի փոխհարաբերություններն ու համագործակցության խորացման հեռանկարները:

«Վրաստանի կառավարության ղեկավարի հայտարարության համաձայն՝ Թբիլիսին առանձնակի կարևորություն է տալիս Թուրքիայի հետ հարաբերությունների հետագա խորացմանը: Հանդիպմանն առանձնակի ուշադրություն է դարձվել տնտեսական համագործակցության հարցերին, նշվել է, որ Թուրքիան Վրաստանի թիվ մեկ առևտրական գործընկերն է»,- ասված է հաղորդագրության մեջ:

Հանդիպմանը ներկա են եղել Վրաստանի փոխվարչապետ, Էկոնոմիկայի և կայուն զարգացման նախարար Գեորգի Կվիրիկաշվիլին, արտաքին գործերի նախարար Թամարա Բերուչաշվիլին, ինչպես նաև կառավարության վարչակազմի փոխղեկավար Նինո Կոբախիձեն: