Գուցե նրանք ունեն մեծ անուն, շատ ճանաչված են, բայց դա չի նշանակում, որ մեծ դեր են խաղացել. Գիսանե Պալյան

Սերժ Սարգսյանը մի խումբ արվեստագետների պարգևատրելու մասին հրամանագրեր է ստորագրել:

Երաժշտարվեստի բնագավառում ունեցած վաստակի համար երգիչ Հարութ Եսայու Փամբուկչյանին և Արմեն Հարպետի Գոնդրաչյանին (բեմական կեղծանունը՝ Արմենչիկ) շնորհվել է Հայաստանի Հանրապետության վաստակավոր արտիստի պատվավոր կոչում:

Արմենչիկին և Ձախ Հարութին վաստակավոր արտիստի պատվավոր կոչում շնորհելու հանգամանքը լայն արձագանք ստացավ սոցցանցերում, և քննադատությունների մեծ ալիք բարձրացավ:

ԼՈՒՐԵՐ.com-ը զրուցեց երաժշտագետ, դաշնակահարուհի Գիսանե Պալյանի հետ:

«Մեր երկրում ամեն ինչ արվում է շատ անհասկանալի ձևով: Ես չեմ կարող որևէ բացատրություն գտնել: Ըստ երևույթին՝ նրանք, ովքեր պարգևատրել են, գտնում են, որ իրոք ունեն արժանիքներ:

Իմ կարծիքով՝ կան շատ ավելի լավ արվեստագետներ, ովքեր իրոք արժանի են այդ կոչմանը և ավելին են արել Հայաստանի համար:

Ես չեմ զարմանում, որովհետև մեր երկրում ամեն ինչ այնպես չէ, ինչպես մենք կուզեինք:

Վստահ եմ, որ շատ ու շատ անուններ կային, որ պետք է վաղուց ստանային այդ կոչումները, ավելին՝ պետք է պետական մարմինների կողմից պրոպագանդվեր նրանց արվեստը:

Շատ մարդիկ, ովքեր արժանի են, մնում են ստվերում, որովհետև չեն պրոպագանդվում, դրա համար նրանց պետք է պետական աջակցությունը, այնուհետև պարգևատրելը՝ որպես կարևոր գործ անող:

Գուցե նրանք ունեն մեծ անուն, շատ ճանաչված են, բայց դա չի նշանակում, որ մեծ դեր են խաղացել»,- ասաց Գիսանե Պալյանը: