«Նոր ալիք»-ում Հայաստանը ներկայացնող Գրիգոր Կյոկչյանը մասնակցում է woman.ru կայքի մրցույթին

«Նոր ալիք» երգի մրցույթում այս տարի Հայաստանը ներկայացնող Գրիգոր Կյոկչյանը մասնակցում է woman.ru կայքի հայտարարած մրցույթին և հաղթելու դեպքում հատուկ մրցանակ կստանա: Կայքն օնլայն քվեարկություն է սկսել, որի արդյունքում ընթերցողները կորոշեն «Նոր ալիք»-ի այս տարվա լավագույն արտիստին: woman.ru-ում հնարավոր է քվեարկել նաև Հայաստանի ներկայացուցչի օգտին:

Սոչիից «Արմենպրես»-ի հետ զրույցում Գրիգոր Կյոկչյանը նշեց, որ յուրաքանչյուր մրցանակ կարևոր է' մանավանդ երիտասարդ արտիստի համար:

«Հետևաբար նաև այս մրցանակն է կարևոր, չէ՞ որ սա միջազգային հարթակ է: Բայց ամենագլխավորը «Նոր ալիք»-ում լավ ելույթ ունենալն է»,- նշեց նա:

Այս պահին Գրիգոր Կյոկչյանն ունի 1600-ից ավելի ձայն: «Նոր ալիք»-ում Հայաստանն այս տարի ներկայացնող երգիչը մինչև Սոչի մեկնելն «Արմենպրես»-ի հետ զրույցում նշել էր, որ շատ ուրախալի և պարտավորեցնող է համարում մասնակցությունն այդ հեղինակավոր իրադարձությանը:

woman.ru կայքը նախորդ տարի հատուկ մրցանակ էր շնորհել «Նոր ալիք-2014»-ում Հայաստանը ներկայացնող երգչուհի Սոնա Ռուբենյանին: Կայքի ընթերցողները հենց նրան էին համարել մրցույթի լավագույն արտիստ:

Միջազգային «Նոր ալիք» մրցույթը կազմակերպվում է ամեն տարի: Առաջին մրցույթը տեղի է ունեցել 2002 թվականին Յուրմալայում: Երաժշտական տոնի ստեղծման գաղափարը պատկանում է Իգոր Կրուտոյին և Ռայմոնդ Պաուլսին: 2008 թվականից սկսած' ամեն տարի անցկացվում է նաև «Մանկական Նոր ալիք»-ը, որի առաջին մրցույթը տեղի է ունեցել նոյեմբերի 28-29-ին Մոսկվայում: Այս տարի իրադարձությունը կանցկացվի Սոչիում հոկտեմբերի 2-11-ն ընկած ժամանակահատվածում: