Հանրապետականն էնքան ուժեղ էր, որ իրանք իրար էին նեղացնում, ուրիշին չէին նեղացնում. Մանվել Գրիգորյան

Այսօր Եռաբլուր զինվորական պանթեոնում գեներալ Մանվել Գրիգորյանը լրագրողների հետ զրույցում խոսելով Հայաստանի ներքաղաքական զարգացումների մասին՝ նշեց, որ մերժում է ընդդիմության այն պնդումը, թե իշխանությունը հող հանձնելու մտադրություն ունի. «Ընդդիմության գործի անունն է սա, չաշխատող խոփը աշխատող խոփին բան պտի ասի: Մեկը որ չի աշխատում՝ էն մեկն է աշխատում, թերություններ է լինում, ուրեմն պիտի քննադատեն, ասեն: Քննադատությունը վատ չի, բայց դե չափի մեջ լինի, մանավանդ՝ երկրի, պետության անվտանգության հարցն է, թող էլի քննադատեն»:

Դիտարկմանը, որ Լեւոն Տեր-Պետրոսյանը նշում էր, թե խաղաղության փաստաթուղթ է պարտադրվելու իշխանությանն անկախ նրանից,  թե ով է լինելու իշխանության ղեկին, Մանվել Գրիգորյանը պատասխանեց. . «Դե դա Լեւոն Տեր-Պետրոսյանի տեսակետն է, կարծիքն է, բայց վազելով ոչ մեկը տենց բան չի անի: Տենց բան անող էլ չի կարա լինի՝ տանենք-տանք եւ այլն: Ուզում են, բայց փոխարենն ի՞նչ են տալիս: Մի անգամ լսե՞լ եք՝ ասեն՝ էս տալիս ենք, էս տվեք: Հո մենակ ուզելո՞վ չի, չկա՛ տենց բան»:

Մանվել Գրիգորյանը նաև հավելեց, որ հայոց պատմության մեջ առաջին անգամ հայ մարդը՝ որպես կամավորական, օրենսդրորեն ճանաչվեց, և այդ մարդն ինքն է, քանի որ Տիգրան Մեծից հետո դեռ չէր եղել նման բան: «Առաջիկայում էլ շատ  անելիքներ ունեմ ԱԺ-ում ու ահագին խնդիրներ կան, որոնք պետք է լուծեմ»:

Գեներալը խոսեց նաև խորհրդարանական ընտրությունների ժամանակ  ՀՀԿ-ի կուսակցական դիրքերի մասին, նշելով. «Ազգային ժողովի ընտրությունների ժամանակ Հանրապետականն էնքան ուժեղ էր, որ իրանք իրար էին նեղացնում, ուրիշին չէին նեղացնում: Օրինակ՝ Էջմիածնի տարածքում որ մեր գեներալ Սարոյանը թեկնածությունը դրել էր, ճարեք  մի հոգի,  որ մեկին ստիպել ենք կամ բան ենք արել»,- ասաց Մանվել Գրիգորյանը: