Հայ զինվորի վերանվաճված բնագծերը չեն պաշտպանվում. դա իշխանությունների անպատասխանատվության արգասիքն է․ Րաֆֆի Հովհաննիսյան

Շուշիի ազատագրումը, փաստորեն, շրջեց պատմության անիվը' հօգուտ մեր ժողովրդի: Այս մասին ասված է «Ժառանգություն» կուսակցության առաջնորդ, ԱԳ նախկին նախարար Րաֆֆի Հովհաննիսյանի՝ Հաղթանակի ու խաղաղության տոնի և Շուշիի ազատագրման օրվա կապակցությամբ հայ ազգին ուղղված շնորհավորական ուղերձում:

Ուղերձում, մասնավորապես, ասված է.

«Մայիսի 9-ի երկու հիշարժան ամսաթվերի' Հաղթանակի ու խաղաղության տոնի և Շուշիի ազատագրման օրվա զուգադիպությունն իր մեջ մեծ իմաստ է ամփոփում: Այն խորհրդաշում է հայի ազգային խառնվածքին ներհատուկ հայրենասիրությունն ու խիզախությունը, սխրանքն ու անձնազոհությունը, օտարի լծի դեմ մեկ մարդու նման ոտքի ելնելու և «իր սուրը փառքով պատյան դնելու» անկոտրում կամքը: Դարերի խորքից եկող ազգային այդ նկարագիրը հաջող քննություն բռնեց Երկրորդ աշխարհամարտի տարիներին, երբ հայ ժողովրդի պանծալի զավակները' այլ ազգերի ներկայացուցիչների հետ ձեռք ձեռքի, մարտնչում էին ֆաշիստական Գերմանիայի դեմ' փրկելով աշխարհը նացիզմի ճիրաններից: Հայրերի ու պապերի հերոսական դասը շարունակեց արդեն նոր սերունդը' Արցախյան գոյամարտում պաշտպանելով հայրենի բնօրրանը և դարբնելով նոր հաղթանակներ:

Շուշիի ազատագրումը, ինչպես նաև Արցախի Հանրապետության պաշտպանության բանակի ստեղծումը, որը ևս համընկնում է մայիսյան հաղթանակների օրվա հետ, դարձան այն կարևոր գործիքակազմերը, որոնք պարարտ ենթահող պատրաստեցին մարտադաշտում հայոց հետագա հաջողությունների համար: Շուշիի ազատագրումը, փաստորեն, շրջեց պատմության անիվը' հօգուտ մեր ժողովրդի: Ցավալի է միայն, որ հայ զինվորի արյան և քրտինքի գնով վերանվաճված բնագծերը, ինչպես հարկն է, չեն պաշտպանվում դիվանագիտական ճակատում ու չեն արժևորվում: Եվ դա մեր բարձրագույն իշխանությունների անպատասխանատվության արգասիքն է: Այսպիսով' Մեծ հայրենականի ռազմադաշտում և դրանից ավելի քան կես դար անց Շուշիի բարձունքներում առյուծասիրտ հայորդիների ցուցաբերած արիությունն ու ազատատենչ ոգին կերտեցին հայրենիքի պաշտպանի մի հավաքական կերպար, որը միշտ կուղեկցի մեզ, և որով կդաստիարակվեն բազում նոր սերունդներ:

Շնորհավորում եմ բոլորիս' մայիսյան փառապանծ տոների առթիվ' մաղթելով հայ ժողովրդին խաղաղություն, բարօրություն և առաջընթաց: Փա´ռք ու պատիվ մեծ հաղթանակներ կռած բոլոր նվիրյալներին, վետերաններին, ազատամարտիկներին, սահմանապահներին, բանակի զինվորական և սպայական անձնակազմերին: Հավերժ փա´ռք մեր սուրբ նահատակներին, որոնց հիշատակը երբեք չի խամրի»: