Կառավարությունում նոր կադրեր կհայտնվեն

Այսօր ի թիվս այլ պաշտոնյաների, Հաղթանակի զբոսայգում էր նաեւ ՀՀ վարչապետ Կարեն Կարապետյանն, ով հերոսների հիշատակին հարգանքի տուրք մատուցելուց հետո տեղի տվեց լրագրողների հորդորին եւ պատասխանեց մի քանի հարցի:

Պատասխանելով լրագրողներից մեկի՝ նոր կառավարության ձեւավորման մասին հարցին, վարչապետը նշեց, որ առանցքային եւ լուրջ փոփոխություններ չեն լինի, որովհետեւ առջեւում 2018 թվականն է:

«Մենք չենք պատրաստվում լուրջ փոփոխություն իրականացնել նոր ձեւավորվելիք կառավարությունում: Փոփոխություններ՝ իհա՛րկե կլինեն, նոր կադրեր՝ անպայմա՛ն կհայտնվեն, բայց այդ փոփոխությունները չեն կրի առանցքային բնույթ»,- ասաց վարչապետ Կարեն Կարապետյանը:

Վարչապետը խոսեց նաեւ տնտեսության զարգացմանը միտված՝ ՀՀ կառավարության վարած քաղաքականության մասին, այն որակելով դրական: Հարցին՝ արդյո՞ք ռեալ են իր խոստացած ներդրումների ծավալները, վարչապետը պատասխանեց.

«Այո՛, ռեալ են: Մենք գիտենք ուր ենք գնում եւ ինչպես: Ինձ մի՛ տվեք այնպիսի հարցեր, որոնց լուծման համար ժամանակ է պետք: Ներդրումների ծավալը ռեալ է, պարզապես ժամանակ է պետք թիմ հավաքելու եւ ծրագրային մի շարք դրույթներ իրականացնելու համար»: 

Աղավնի Սուքիասյան