Կտեղադրեն 1717-րդ խաչը. պատգամավորներն այն կփոխանցեն ապրիլյան պատերազմի հերոսներին

Սուրբ Խաչ և Սուրբ Երրորդություն Հույսի Խորան Հաղորդարանում ս/թ-ի հուլիսի 2-ին` ժամը 13:00-ին, տեղի կունենա արդեն ավանդույթ դարձած Խաչադրման արարողություն. Սուրբ Խաչի վրա կտեղադրվի 1717-րդ խաչը` հաջորդաբար խորհրդանշելով Հայաստանում քրիստոնեության ընդունման հերթական տարին:

1713, 1714, 1715, 1716-րդ խաչերի խաչքավորներ ՀՀ ԱԺ պատգամավոր Հակոբ Հակոբյանը, ՀՀ ԱԺ պատգամավոր Վահրամ Բաղդասարյանը, Ալիկ Պետրոսյանը խաչը կփոխանցեն ապրիլյան պատերազմում ինքնամոռաց մարտնչած, հերոսացած, պետական բազում պարգևներ ստացած, հայոց պետական սահմանը պահող հեքիաթի և իրականության յոթ քաջազուն հայորդիներին: Արագածոտնի թեմի առաջնորդ Տեր Մկրտիչ եպիսկոպոս Պռոշյանի հանդիսապետությամբ, հոգևոր դասի ներկայացուցիչների մասնակցությամբ կսկսվի 1717-րդ խաչի օծման արարողությունը:

Այնուհետև օծված խաչը հոգևոր դասի ու ժողովրդի ուղեկցությամբ հանդիսավոր կերպով կբարձրացվի և խաչքավորների ձեռամբ կամրացվի Սուրբ Խաչին: Հոգևոր դասի ներկայացուցիչների կողմից 1717-րդ խաչի օծման արարողությունից հետո կսկսվի համաժողովրդական տոնախմբություն, որին կմասնակցեն և իրենց կատարումներով ժողովրդին կոգևորեն հանրապետության անվանի երգիչ-երգչուհիներ, ՀՀ պաշտպանության նախարարության գեղարվեստական խմբեր:

Տեղի կունենան նաև մատաղի օրհնության արարողություններ: Համաժողովրդական տոնախմբությանը կմասնակցեն հյուրեր սփյուռքից, Արցախից, հանրապետության մարզերից, մտավորականներ, հասարակական և քաղաքական գործիչներ, պետական բարձրաստիճան այրեր և քաղաքացիներ:

Սուրբ Խաչ և Սուրբ Երրորդություն Հույսի Խորան Հաղորդարանի հասցեն է` Արագածոտնի մարզ, Երևան-Ապարան մայրուղու 33 կմ: