Քանի միլիարդ է ծախսել ԱԳՆ-ն

ՀՀ Արտաքին գործերի նախարար էդվարդ Նալբանդյանն այսօր Ազգային ժողովում ներկայացնելով 2016 թվականի բյուջեի կատարողականը, նշեց, որ բյուջեի կատարողականը նախորդ տարի կազմել է 97.9 տոկոս.

«Հատկացված բյուջեի խնայողությունների արդյունքում 304.8 մլն դրամ է տնտեսվել և փոխանցվել պետբյուջե», - ասաց նախարարը:

Արտաքին գործերի նախարարը նաև  նշեց, որ անցյալ տարի ԱԳՆ պարտքը միջազգային կազմակերպություններին՝ կազմել է 2 մլրդ 420 մլն 167 հազար դրամ:

«Ոչ միայն տարեկան անդամավճարներն ենք վճարում, այլև մարում ենք անցած տարիներից կուտակված պարտքը, որը դեռևս 1998 թվականից ունենք: 9 տարի առաջ պարտքը կազմում էր 9 մլն 200 հազար դոլար, իսկ հիմա մոտ հինգ անգամ պակասել է», - նշեց նախարարը:

ՀՀ ֆինանսների նախարարի տեղակալ Ատոմ Ջանջուղազյանը նշեց, որ ԱԳՆ-ն իրականացրել է 19 ծրագիր, որի համար պետբյուջեից հատկացվել է 14.4 մլրդ դրամ: