Սերժ Սարգսյանը գրոհում է...

Սերժ Սարգսյանի ելույթը Կառավարությունում թեպետ կարճ, սակայն բավական լուրջ ու խորքային ուղերձներ պարունակող ելույթ պետք է համարել՝ ուղղված ոչ միայն ներքին լսարանին, այլև արտաքին աշխարհին: Սա միանգամայն բնական է, քանի որ Հայաստանն ու տարածաշրջանն այժմ մի իրավիճակում են հայտնվել, երբ առանց այդ արտաքին ուժերի ոչ մի լուրջ հարց չի կարող կարգավորվել: Այսպիսով՝ ո՞րն էր Սերժ Սարգսյանի՝ արտաքին լսարանին ուղղված հիմնական ուղերձը կամ ի՞նչ էր ակնարկում նախագահն, երբ շեշտադրված կերպով խոսում էր կոռուպցիայի դեմ պայքարի անհրաժեշտության, թափանցիկ աշխատելաոճի, հասարակության դերի բարձրացման   ու նույնիսկ արտաքին քաղաքական հարցերում պատրանքներ չունենալու մասին:

Նախ՝ ակնհայտ է, որ նախագահի խոսքի այդ հատվածը ուղղված է հիմնականում Արևմուտքին: Չմոռանանք, որ նույն ԵՄ-ն, ԱՄՆ-ն Հայաստան-Արևմուտք հարաբերություններում բազմիցս են կարևորել իշխանությունների վճռականությունը՝ պայքարելու կոռուպցիայի դեմ, անցնելու ավելի թափանցիկ աշխատելաոճի, բարձրացնելու հասարակության դերակատարությունը կառավարման համակարգում և այլն: Բանն այն է, որ արևմուտքին հոգեհարազատ գործիքակազմերի ներդրումը նույն եվրոպացիները դիտարկում են որպես Հայաստանի կողմից եկող հաստատուն ազդակ՝ Արևմուտքի հետ կամուրջները չայրելու, ինչը նշանակում է, որ Սերժ Սարգսյանը, իր խոսքում հատուկ ուշադրություն դարձնելով այդ ամենին, փորձում է Արևմուտքին հասկացնել, որ Հայաստանն ամեն կերպ ձգտելու է հավասարակշռված արտաքին քաղաքականություն վարել: «Մենք շարունակելու ենք հետևողականորեն աշխատել մեզ համար արտաքին քաղաքական միջավայրը բարելավելու ուղղությամբ, սակայն պատրանքներ չպետք է ունենանք»,- հայտարերել է նախագահն՝ այսպիսով կոչ անելով իրականությանը նայել ավելի սթափ ու միայն առկա իրողությունները հաշվի առնելով՝ պլանավորել սեփական արտաքին քաղաքականությունը: Մեկ բան հստակ է՝ Սերժ Սարգսյանը հնարավորինս կոմպլեմենտար արտաքին քաղաքականության կողմնակից է, ուժային կենտրոնների միջև հավասարակշռություն պահպանելու ջատագով:

Բոլորն են հասկանում, սակայն, որ այս ամենն այսպես, թե այնպես չի կարող շաղկապված չլինել նաև Հայաստանի ներքին քաղաքականության հետ ու այն էլ մի շրջանում, երբ շատերն այն արդարացիորեն ճակատագրական են համարում Հայաստանի համար. 2018-ի ապրիլը «յոթ սարի հետևում չէ»: Իսկ հաշվի առնելով այն, որ մեզանում բոլոր պարագաներում առաջին պլան են մղվում հենց ներքաղաքական հարցերն, արտաքին քաղաքական հարցերն էլ դիտարկվում են վերջինիս պրիզմայով, ապա պարզ է դառնում Սերժ Սարգսյանի՝ Արևմուտքին հղած ուղերձի իսկությունը: Իսկ ուղերձը մեկն է՝  Հայաստանի վարչապետը չի կարող լինել մեկն, ով կախվածության մեջ կգտնվի միայն մեկից, ով Հայաստանի արտաքին քաղաքականոթյունը կկառուցի միայն մեկ ուղղությամբ, ով կփակի Հայաստանի դռները աշխարհի առջև. ինքը դա գիտակցում է ու, բնականաբար, պատրաստ է անհրաժեշտ աջակցության պարագայում (այժմ Սերժ Սարգսյանն առավել քան երբևէ զգում է Արևմուտքի աջակցության կարիքը) անձամբ զբաղվել խնդրով. Սերժ Սարգսյանը Հայաստանի ապագա վարչապետի լավագույն ու անփոխարինելի թեկնածուն է՝ հակառակ Կարեն Կարապետյանի, ով հաշվետու է լինելու միայն Ռուսաստանին՝ անտեսելով մյուս աշխարհաքաղաքական բևեռի կարծիքը, առավելագույնս նվազեցնելով Արմուտքի ազդեցությունը Հայաստանի վրա:

Թե ինչ արձագանք կստանա Սարգսյանի ուղերձն Արևմուտքի կողմից, երևիթե առավելապես պարզ կլինի Սարգսյան-Թրամփ առաջիկա հանդիպման արդյուքններից, բայց այն, որ ուղերձի բովանդակությունը միանշանակ է, կասկածի տեղիք չի թողնում. ներիշխանական պայքարը միայն սրվում է:

Դավիթ ԲԱԲԱՆՈՎ