«Բանանց»-ը նոր ֆուտբոլիստ ունի

Երևանի «Բանանցը» պայմանագիր է ստորագրել 34-ամյա պաշտպան Գևորգ Հովհաննիսյանի հետ:  Այս մասին տեղեկացնում է ակումբի կայքը:
Փորձառու ֆուտբոլիստը ողջ կարիերայի ընթացքում հանդես է եկել Գյումրու «Շիրակի» կազմում: Նա մասնակցել է Հայաստանի առաջնության Բարձրագույն խմբի 240 հանդիպման և դարձել է 10 գոլի հեղինակ:
«Շիրակի» կազմում Գևորգ Հովհաննիսյանը դարձել է Հայաստանի չեմպիոն, կրկնակի գավաթակիր և սուպերգավաթակիր:

«Արդեն հարցրել եմ մերվել ակումբի և թիմի հետ: Շնորհակալություն եմ հայտնում լավ ընդունելության համար: Հուսով եմ, որ հուսախաբ չեմ անի «Բանանցի» ղեկավարությանը, մարզչական շտաբին և երկրպագուներին: Ամեն ինչ կանեմ, որպեսզի օգնեմ ներկայիս ակումբիս հասնել իր առջև դրված նպատակներին»,- ասել է Գևորգ Հովհաննիսյանը:

«Գևորգ Հովհաննիսյանը 34 տարեկան է, բայց ինձ համար տարիքը նշանակություն չունի: Գտնում եմ, որ պաշտպանի համար դա շատ լավ տարիք է: Հայաստանի առաջնությունում նա մեծ փորձ ունի, բավական լավ է խաղում երկրորդ հարկում, ինչը կենտրոնական պաշտպանի համար շատ կարևոր է: Հույս ունեմ, որ իր փորձով օգտակար կլինի թիմին, քանի իր կողքին խաղում են երիտասարդ ֆուտբոլիստներ, ովքեր շատ բան ունեն սովորելու»,- Գևորգ Հովհաննիսյանի տեղափոխությունն այսպես է մեկնաբանել «Բանանցի» գլխավոր մարզիչ Արամ Ոսկանյանը:

Գևորգ Հովհաննիսյանը նաև մեկ անգամ հանդես է եկել Հայաստանի հավաքականում՝ 2016-ի սեպտեմբերին խաղալով Դանիայի դեմ արտագնա խաղում: