«Ադրբեջանն իրականացնում է հեռուն գնացող քաղաքականություն, որի նպատակն է սկսել լայնամասշտաբ ռազմական գործողություններ». պատգամավոր

«Վտանգավոր շրջափուլ է սկսվել, և Ադրբեջանը օգտագործում է տարբեր հարթակներ և հնարավորություններ՝ լարելով իրավիճակը արցախա-ադրբեջանական շփման գծում: Իհարկե, տարբեր ժամանակահատվածներում էլ նորից ռազմական գործողություններ են ձեռնարկվել, որոնք ցույց են տալիս, որ Ադրբեջանը պատրաստ չէ խաղաղ ճանապարհով հարցը լուծելուն»,-այս մասին այսօր Ազգային ժողովում ասաց ՀՀԿ-ական պատգամավոր Կորյուն Նահապետյանը: 

Խոսելով հայկական կողմի ձեռնարկած պատասխան գործողությունների մասին՝ պատգամավորը նշեց, որ մեր գործողությունները պետք է լինեն համարժեք և հստակ, և այս առումով Արցախի ՊԲ ռազմական գործողությունները համարժեք են իրավիճակին. «Առաջին անգամ չէ, որ մենք բացահայտում ենք, որ Ադրբեջանի բանակը թաքնվում է սեփական ժողովրդի թիկունքում՝ ցույց տալով, որ իրենց բացարձակապես չի  հետաքրքրում սեփական ժողովրդի անվտանգությունը»: 

Պատգամավորը շեշտեց, որ միջազգային հարթակներում հայկական կողմն առավել ակտիվ պետք է աշխատի` քաղաքական  և դիվանագիտական խողովակներով ներկայացնելով խնդրի էությունը. «Ադրբեջանն իրականացնում է հեռուն գնացող նոր քաղաքականություն, որի նպատակն է սկսել լայնամասշտաբ ռազմական գործողություններ»: 

Հարցին՝ արդյոք ժամանակը չէ, որ արցախյան խնդրի կարգավորման հարցում Հայաստանը որդեգրի ավելի կոշտ դիրքորոշում, պատգամավորը նշեց, որ խնդիրը կոշտությունը չէ և իրավիճակը պահանջում է լինել զգոն բոլոր ուղղություններով: