Մինչև ընկերներիս չբերեք չենք մասնակցելու. «Սասնա ծռեր»-ի անդամներ

Փաստաբաններին պատասխանատվության ենթարկելու համար դատարանը կդիմի Փաստաբանական պալատ:

Նշենք՝ այսօր դատական նիստի ժամանակ պաշտպաններ Լուսինե Սահակյանը և Երվանդ Վարոսյանը լքել էին դատական նիստերի դահլիճը, քանի որ իրենց պաշտպանյալները ներկա չէին նիստին:

«Մինչև ընկերներիս չբերեք չենք մասնակցելու: Ես իմ պաշտպանից պահանջում եմ դուրս գալ դահլիճից և չմասնակցել նիստին: Մեզ վերաբերվում եք որպես հանցագործների: Նրանց, որոնք լիքը արյուն են թափել ժողովրդի համար, այսօր դատարանում ծեծում եք»,- հայտարարեց Արամ Մանուկյանը: Վերջինս և Հովհաննես Հարությունյանը լքեցին նիստերի դահլիճը:

Դատարանը նրանց նկատմամբ ևս սանկցիա կիրառեց. հեռացնել նիստերի դահլիճից:

Քիչ անց ամբաստանյալներից Թաթուլ Թամրազյանը ևս լքեց դատական նիստերի դահլիճը:

Այսօրվա նիստին 18 ամբաստանյալներից մասնակցում են միայն 3-ը` Հովհաննես Հարությունյանը, Թաթուլ Թամրազյանը, Արամ Մանուկյանը:

Հիշեցնենք, որ դատավոր Արտուշ Գաբրիելյանը նախորդ նիստին վեց ժամով հեռացրել էր «Սասնա Ծռեր» խմբի 18 անդամներից 15-ին. նրանց նկատմամբ դատական սանկցիա էր կիրառվել ոտքի չկանգնելու համար:

Հիշեցնենք՝ «Սասնա ծռեր» կոչվող զինված խումբը անցած տարվա հուլիսի 17-ին գրավել և երկու շաբաթ վերահսկողության տակ էր պահել Ոստիկանության ՊՊԾ գնդի տարածքը: Այդ ընթացքում զոհվել էր երեք ոստիկան: Հուլիսի 31-ին խմբի անդամները հանձնվեցին իրավապահներին:

Ոստիկանության ՊՊԾ գնդի տարածքը գրաված զինված խմբի գործի շրջանակներում ավելի քան 60 մարդ է մեղադրվում, որոնց հիմնական մասին մեղսագրվում է կազմակերպված խմբի կողմից ապօրինի կերպով զենք և զինամթերք կրելը, փոխադրելը, շենք-շինություններ գրավելը, պատանդ վերցնելը, գույք ոչնչացնելը։

Սոնա Հարությունյան