Ռուսական ռազմաբազան սպասարկող գումարները ներկայացվում են որպես ներդրում

Ազգային ժողովի արտաքին հարաբերություների հանձնաժողովի նախկին նախագահ, փորձագետ Հովհաննես Իգիթյանի համոզմամբ՝ իշխանությունները ՀՀ-ԵՏՄ անդամակցության մասին խոսելիս, այդ փուլը պետք է բաժանել երեք մասի. «1-ին՝ արդյոք պե՞տք էր մտնել այդ թիմի կազմ, թե՞ ոչ: Այս հարցը դեռ տարիներ առաջ պետք է քննարկվեր, 2-րդ փուլում պետք է հաշվարկվեր ԵԱՏՄ-ին մեր անդակամցության դրական դինամիկան, որը, չգիտես ինչու, Կառավարության տարբեր ներկայացուցիչներ տարբեր թվեր են բերում: Կառավարությունը չի տեսնում այդ տնտեսական հաշվարկները: Սա փաստում է, որ այո՛, մենք էլ ենք հասկանում՝ ում հետ գործ ունենք ԵԱՏՄ-ում»,-այսօր կայացած մամուլի ասուլիսի ժամանակ ասաց փորձագետը՝ որպես անդամակցության 3-րդ փուլ՝ նախանշելով այն հանգամանքը, որ այդ կառույցի ներսում ՀՀ խնդիրներն այդպես էլ չլուծվեցին:  

Ըստ Իգիթյանի՝ ստեղծված իրավիճակում միայն իշխանությունն է, որը կարող է նախանշել՝ ինչպես պետք է դուրս գալ այդ միությունից. «Միայն իշխանությունը կարող է ցույց տալ այդ ճանապարհից առանց կորուստների դուրս գալու ճանապարհը»:

Հովհաննես Իգիթյանին վստահություն չեն ներշնչում նաև Կառավարության տված՝ ներդրումների մասին խոստումները, քանի որ դրանք ոչ թե իրական ներդրումներ են, այլ՝ ռուսական ֆինանսական հոսքեր, որոնք սպասարկում են, օրինակ, մեր երկրում գտնվող ռուսական ռազմաբազան. «Մեզ մոտ նվազում են արտասահմանյան ուղղակի ներդրումները, թեև իշխանական ճամբարից բերում են թվեր, որոնք կապ չունեն իրականության հետ: Դրանք այս կամ այն ձևով կապված են մեր երկրում գտնվող ռուսական ընկերությունների հետ, կամ սպասարկում են Հայաստանում գտնվող ռուսական ռազմաբազան: Այդ ներդրում ներկայացվող գումարից պետք է հանել այն 2 մլրդ խորանարդ գազի դիմաց տրվող գումարը: Հետևաբար, պետք չէ այս թվերը ներկայացնել որպես ներդրում»,-ասում է Իգիթյանը: 

Այս համատեքստում նա կարևորեց ՀՀ-ի և ԵՄ միջև ստորագրված համաձայնագիրը, որը լայն հնարավորություն է ընձեռում տնտեսության մեջ ներդրումներ ներգրավելու համար. «Սա շատ լավ գիտակցում են նաև ռուսական կողմում, ինչ ապացույցը վերջին շրջանում ռուսական լրատվամիջոցբերով եթեր գնացող հակահայկական հաղորդումներն են»,-ասաց Իգիթյանը: