Ստորագրահավաք՝ ընդդեմ «Սորոսի»

«Ժողովրդի ձայնը» հասարակական կազմակերպությունը Երեւանում եւ ՀՀ բոլոր մարզերում հոկտեմբերին կատարել է սոցհարցում` պարզելու, թե հայ բնակչությունն ինչ կարծիք ունի Հայաստան-ԵՄ համաձայնագրի, ինչպես նաեւ «Ընտանեկան բռնության կանգարգելման» եւ խտրականության մասին օրենքների նախագծերի վերաբերյալ:

Հարցմանը մասնակցել են 3300 քաղաքացիներ, որոնից 45 տոկոսը կանայք, 50 տոկոսը` տղամարդիկ:

ՀԿ-ի փորձագետ Ծովինար Կոստանյանը նշեց, որ օրենքների եւ համաձայնագրի կնքելու մասին ամենաշատը տեղյակ են եղել Երեւանում եւ Արմավիրի մարզում, իսկ ամենաքիչը՝ Տավուշում. «Հայաստան-ԵՄ համաձայնագրի ստորագրմանը բացասական պատասխան տվողների 62 տոկոսը կարծում է, որ Եվրամիությունը Հայաստանին պարտադրում է զանազան օրենքներ: Հարցում է կատարվել նաեւ խտրականության մասին օրենքի վերաբերյալ եւ հարցվողների 57 տոկոսի կարծիքով` Հայաստանն այս օրենքի կարիքը չունի, 27 տոկոսը կարծքում է, որ ունի, իսկ 16-ը` չգիտի հարցի պատասխանը»,-ընդգծեց Կոստանյանը:

Ընտանեկան բռնության կանխարգելման եւ սեռական փոքրամասնությունների խտրականության մասին օրենքները անհրաժե՞շտ են Հայաստանին, թե՞ ոչ. հարցվածների 57 %-ը պատասխանել է՝ ոչ, 27 %-ը՝ այո եւ 16 %-ն է միայն ասել, որ չգիտի։ 

«Ժողովրդի ձայն» ակումբի փորձագետ Արման Ղուկասյանը նշեց, որ հարցման մասնակիցների 34%-ի կարծիքով, այդ օրենքների ընդունման պարագայում կոտնահարվեն ընտանեկան արժեքները, 49%-ը կարծում է, որ հասարակության մեջ այլասերվածություն կտարածվի, իսկ 42 %-ը գտնում է, որ այն կարող է հանգեցնել հեղաշրջման։ 

 Ըստ նրա՝ լոբբինգ իրականացնող ՀԿ-ի հետևում կանգնած է «Սորոսի» հիմնադրամը և այս հիմնադրամի գործունեության վերաբերյալ հարցվողների 74 տոկոսը տվել է բացասական գնահատական, 8 տոկոսն էլ դժվարացել է պատասխանել հարցմանը. «Այս հարցումը մեզ համար հիմք է հանդիսանում, որպեսզի սկսենք մի գործընթաց, որը հիմնականում ուղղված կլինի «Սորոսի» հիմնադրամի կասեցմանը Հայաստանում: Մենք սկսելու ենք ստորագրահավաք, որպեսզի դիմենք պատկան մարմիններին` «Սորոսի» գործունեությունը կասեցնելու համար»,-ասաց Ղուկասյանը: