«Գազպրոմ»-ին չե՞ն նեղացնի...

Վերլուծական 1 Դեկտեմբեր, 2017 17:35

«Ժամանակ»-ը գրել է. «Հայաստանի կառավարությունը ԱԺ է ներկայացրել «Էներգախնայողության և վերականգնող էներգետիկայի մասին» օրենքում լրացում և փոփոխություններ կատարելու մասին օրենքի նախագիծը։ Այս նախագծում առաջարկվում է մի փոփոխություն, որը, ըստ էության, կարող է կործանարար հետևանքներ ունենալ վերականգնող էներգետիկայի զարգացման համար, վերացնել դրա գոյության հեռանկարը Հայաստանում։ Կառավարությունը նոր օրինագծով առաջարկում է, որ ինքնավար էներգաարտադրողների համար գնման սակագին սահմանվի արդյունաբերական կայանների համար սահմանված սակագինը, եթե այն փոքր է 23 դրամից: Հիմա արդյունաբերական կայանների համար սակագին է սահմանված 52 դրամը, ինչը 2,5 անգամ բարձր է 23 դրամից: Հասկանալի է, որ կառավարությունը չի կարող իմպերատիվ կարգով արգելել ինքնավար կայանների կառուցումը՝ պատճառաբանելով, որ այդ դեպքում տուժելու է վարչապետի ընտանիքի բիզնեսը կամ կրճատվելու են ռուսական գազի սպառման ծավալները, ինչը կառավարությունը չի կարող թույլ տալ՝ հաշվի առնելով «Գազպրոմ»-ի շահերը: Ստացվում է՝ մի կողմից կառավարությունը խոսում է այլընտրանքային էներգետիկայի զարգացման անհրաժեշտության մասին, մյուս կողմից՝ արհեստականորեն ստեղծում այնպիսի օրենսդրական դաշտ, որում արևի ջերմությունը նույնպես մոնոպոլիզացվում է:

Ի՞նչ է ստացվում: Ամբողջ աշխարհում զարգանում է այլընտրանքային էներգիան, օգտագործում են վերականգնվող աղբյուրներ, սակայն Հայաստանում այս ուղղությամբ արդյունքները շոշափելի չեն: Այստեղ էներգիայի հիմնական աղբյուրը շարունակում է մնալ «ավանդականը»՝ մեծ հիդրոկայանները, ատոմային էներգետիկան և ջերմակայանները: Հայաստանի էներգետիկ համակարգում ստեղծվել է իսկապես հետաքրքիր վիճակ: Կան էներգաարտադրող ահռելի հզորություններ, բայց Հայաստանի շուկան ակնհայտ փոքր է դրանց արտադրանքն ամբողջությամբ սպառելու համար: Միեւնույն ժամանակ, բավական բարդ է տարածաշրջանում այն սպառելը թե՛ ենթակառուցվածքային, թե՛ քաղաքական խնդիրների պատճառով: Դրան ավելանում է նաեւ այն, որ Հայաստանի համար ռազմավարական խնդիր է վերականգնվող, այլընտրանքային էներգետիկայի, մասնավորապես, արեւային էներգիայի արտադրության ընդլայնումը, ինչը էլ ավելի «կնեղացնի» ներքին շուկան: Բայց, ինչպես տեսնում ենք՝ կառավարությունը չի պատրաստվում էական քայլեր կատարել այլընտրանքային էներգետիկայի զարգացմանը նպաստելու ուղղությամբ, քանի որ հանդիպում է էներգետիկ դաշտում խոշոր խաղացողների, մասնավորապես՝ «Գազպրոմ»-ի դիմադրությանը:

Ստելլա Խաչատրյան