ՄԻԱՎ վարակի գրանցված դեպքերի հաշվով առաջին տեղում շարունակում է մնալ Շիրակի մարզը

 ՄԻԱՎ վարակի գրանցված դեպքերը նվազեցնելու ու ՁԻԱՀ-ի համաճարակի վերաբերյալ իրազեկության մակարդակի բարձրացման նպատակով դեկտեմբերի 1-ին Գյումրիում տեղի ունեցավ «Առողջ լինելու իմ իրավունքը» խորագիրը կրող տեղեկատվական միջոցառումը:
Միջոցառումն իրականացվեց «Հայկական Կարիտաս» բարեսիրական ՀԿ-ի «ՄԻԱՎ/ՁԻԱՀ-ի կանխարգելումը հետխորհրդային երկրներում» ծրագրի շրջանակներում։ Միջոցառման ընթացքում ներկայացվեցին հետաքրքիր և արդիական փաստեր ՄԻԱՎ վարակի վերաբերյալ, իսկ ծրագրի երիտասարդ կամավորները ներկայացրին ՁԻԱՀ-ի դեմ պայքարելու իրենց մեթոդը՝ իրազեկում խաղերի միջոցով։
Դեկտեմբերի 1-ը 1988 թվականից ի վեր նշվում է որպես ՁԻԱՀ-ի համաշխարհային օր։ Այն նվիրված է ՁԻԱՀ-ի համաճարակի վերաբերյալ իրազեկվածության մակարդակի բարձրացմանը։ 
Ներկայումս Հայաստանի Հանրապետությունում ՄԻԱՎ-ով ապրող մարդկանց գնահատված թիվը կազմում է 3300, որոնցից միայն 60%-ը գիտի իր կարգավիճակի մասին: ՄԻԱՎ վարակի գրանցված դեպքերի հաշվարկը վկայում է այն մասին, որ ամենաբարձր ցուցանիշը Շիրակի մարզում է՝ 100,000 բնակչի հաշվով։ «ՄԻԱՎ/ՁԻԱՀ-ի կանխարգելում հետխորհրդային երկրներում» ծրագիրը, խիստ կարևորում է իրազեկման դերը հատկապես Շիրակի մարզի գյուղական համայնքների ազգաբնակչության շրջանում՝ ընդգրկելով նաև ավագ օղակում սովորող դպրոցահասակ աշակերտներին, ովքեր արդեն դպրոցական նստարանից կիմանան վտանգից զգուշանալու կանոնները և զերծ կմնան ՄԻԱՎ-ով վարակվելու ռիսկից։ 
Միջոցառման նպատակն էր խթանել ՄԻԱՎ վարակի մասին տեղեկատվության տարածումը և երիտասարդների ներգրավումը ՁԻԱՀ-ի դեմ պայքարում։
Ծրագրի շրջանակներում ձևավորված «Երիտասարդական ակումբ»-ում ներգրավված են ծրագրի թիրախ գյուղական համայնքների դպրոցների աշակերտները, ովքեր իրենց պատկերացմամբ ցույց տվեցին ՄԻԱՎ վարակի մասին իրազեկ և տեղեկացված լինելու անհրաժեշտությունը խաղերի և բեմականացման միջոցով։ 
«Այսօրվա երիտասարդությունը ունի ակտիվ, իրազեկ և առողջ հասարակություն ձևավորելու բոլոր նախադրյալները և մասնակցային մոտեցումը միայն կնպաստի առկա խնդիրների լուծմանը։Այն, որ շատ դեպքերում իրազեկության կարիքը կա՝ փաստում են նաև երիտասարդները»,- «Արմենպրես»-ին տեղեկացրեց ծրագրի համակարգող Աննա Հակոբյանը: 
Հանրային առողջապահություն ոլորտի «ՄԻԱՎ/ՁԻԱՀ-ի կանխարգելումը գյուղական համայնքներում» ծրագիրն իրականացվում է դեռևս 2012 թվականից, որի շրջանակներում Շիրակի մարզի 60 գյուղական համայնքներում կատարվեցին ՄԻԱՎ-ի և վերարտադրողական առողջության վերաբերյալ իրազեկության մակարդակի բարձրացմանն ուղղված աշխատանքներ, ինչպես նաև համայնքաբնակներին տրվեց անվճար և անանուն հետազոտության հնարավորություն։ 
«ՄԻԱՎ/ՁԻԱՀ-ի կանխարգելումը հետխորհրդային երկրներում» ծրագիրը նախորդի տրամաբանական շարունակությունն է, թերևս մի քանի բան փոխվել է։ Վերջինս համատեղ իրականացվող ծրագիր է Վրաստանի և «Կարիտաս Օդեսա»-ի հետ և ընդգրկում է Շիրակի մարզի 30 գյուղական համայնք։ Այս ծրագրում նաև իրազեկման աշխատանք է տարվում վերը նշված 60 համայնքների դպրոցների հետ, որոնք ունեն ավագ օղակ։ Բարձր դասարանի աշակերտների հետ աշխատելու կարևորությունը կայանում է նրանում, որ վերջինս հնարավոր ապագա միգրանտն է ու ՄԻԱՎ-ից պաշտպանվելու լրացուցիչ գիտելիքները միայն կհամալրեն դպրոցում ստացածը և ՄԻԱՎ վարակի նկատմամբ ավելի լուրջ վերաբերմունք կձևավորեն աշակերտների մոտ։ Հայաստանը Վրաստանի և Ուկրաինայի հետ մեկտեղ համարվում է ՄԻԱՎ-ի բարձր տարածվածություն ունեցող երկիր, ուստի դա էր պատճառը՝ համատեղ գործելու և ՄԻԱՎ վարակին միասին հակազդելու։
Ըստ պաշտոնական վիճակագրական տվյալների՝ Հայաստանը այն 7 երկրների շարքում է, որտեղ ՄԻԱՎ վարակը ոչ թե նվազում, այլ տարեցտարի աճում է։ Սա պայմանավորված է մի շարք հանգամանքներով, որոնցից ամենագլխավորը արտագաղթն է։ Ըստ ՁԻԱՀ-ի Կանխարգելման հանրապետական կենտրոնի հրապարակած տեղեկատվության՝ 1988 թ-ից մինչ այսօր ՀՀ-ում ՄԻԱՎ վարակով ապրող անձանց հաշվարկային թիվը 3600 է։ ՄԻԱՎ վարակի գրանցված դեպքերի հաշվով առաջին տեղում Շիրակի մարզն է, որին հաջորդում են Լոռու, Գեղարքունիքի և Արմավիրի մարզերը:

Արմենուհի Մխոյան