«Կաղնու ծառ Լոռվա ձորում»․ տեղի ունեցավ Կառլոս Աբովյանի գիրք-հուշալբոմի շնորհանդեսը (լուսանկարներ)

Դեկտեմբերի 1-ին, Ավետիք Իսահակյանի անվան կենտրոնական գրադարանում, տեղի ունեցավ վանաձորցի գեղանկարիչ, դիմանկարիչ Կառլոս Աբովյանին նվիրված հուշերի գրքի շնորհանդեսը։ Վանաձորցի գեղանկարչին նվիրված գրքի անվանումն էլ պատահական չէ՝ «Կաղնու ծառ Լոռվա ձորում»։

Շնորհանդեսին ելույթներով հանդես եկան Լիպարիտ Սարգսյանը, Շողիկ Ամիրխանյանը, Սերգո Երիցյանը և այլք։ Իսկ միջոցառման ընթացում էկրանին ցուցադրվեցին նկարչի աշխատանքները։

Դեռևս 2009-ին հրատարակված գիրք-հուշալբոմը նվիրված է գեղանկարիչ Կառլոս Աբովյանի կյանքին ու ստեղծագործությանը։ Մտերիմների, բարեկամների, ընկերների հուշերից հառնում է մեծանուն արվեստագետի առինքնող մարդկային կերպարը։

ԼՈւՐԵՐ․com-ի թղթակցի հետ զրույցում գեղանկարիչ Կառլոս Աբովյանի դուստրը՝ գրքի կազմող Անուշ Աբովյանը նշեց, որ գրքում ներառված են ոչ միայն հուշեր գեղանկարչի մասին, այլև վերջինիս աշխատանքները:

«Գրքում ներկայացված են գեղանկարներ, դիմանկարներ, որոնք պատկանում են Կառլոս Աբովյանի վրձնին։ Գրքի առաջին էջը զբաղեցնում է Աբովյանների տոհմածառը, որպեսզի ընթերցողը նկարչի ակունքներից գա դեպի նրա արվեստը։ Ընդգրկված են Հրաչյա Մաթևոսյանի, Կառլեն Դալլաքյանի, Հայկ Օհանյանի, Վահագն Մուղնեցյանի, Մելս Սանթոյանի և այլոց՝ իրենց ընկերոջը նվիրված հոդվածները»,- նշեց նկարչի դուստրը՝ ավելացնելով, որ գիրքն ավարտվում է գեղանկարչի գրած թերևս միակ բանաստեղծությամբ։