ՀՀ-ն իր ազգի ներկայացուցչին ուզում էր հանձնել ՌԴ-ին

Ութ ամիս է պայքար է ընթանում, որպեսզի Հայաստանի Հանրապետության դատախազությունը չհանձնի իր ազգի ներկայացուցիչ Սուրեն Խաչատուրովին ՌԴ իրավապահ մարմիններին, ում նկատմամբ քրեական հետապնդում է նախաձեռնել ադերբեջանցի Թելման Իսմայիլովը և իր եղբայրը: Այս մասին ԼՈւՐԵՐ․com-ի թղթակցի հետ զրույցում ասաց փաստաբան Նիկոլայ Բաղդասարյանը։

«Ութ ամիս է դատախազությունը և դատարաններն ամեն գնով` խախտելով քրեական դատավարության օրենսդրության պահանջները փորձում էին ՌԴ-ին հանձնել Սուրեն Խաչատուրին, ում առողջական վիճակը հնարավորություն չի տալիս անգամ ներկայանալ դատարան: Եվրոպական դատարանը մեկ նախադասությամբ կասեցրեց Սուրեն Խաչատուրովի հանձնումը, հիշեցնելով իր որոշման չկատարման հետևանքները և ընդդեմ Թուրքիայի գործը, որի ժամանակ Թուրքիան չէր կատարել Եվրոպական Դատարանի պահանջը»,- նշեց փաստաբանը։

Հարցին՝ ի՞նչն էր պատճառը, որ Հայաստանն արտահանձնման էր ուզում գնալ, Բաղդասարյանը պատասխանեց․

«Տպավորություն է, որ մարդը Հայաստանում որևէ արժեք չունի։ Մեր պաշտոնյաների համար կարևորը, որ լավություն անեն ՌԴ պետական պաշտոնյաներին։ Այսինքն իրենց ծառայությունը մատուցեն Ռուսաստանին՝ հաշվի չառնելով մարդու առողջական ծանր վիճակը։ Իրենք խոստացել են հանձնել, ուրեմն կհանձնեն, և իրենց համար կարևոր չէ օրենքով է դա, թե ոչ», - նշեց նա։

Բաղդասարյանը պատմեց, որ Սուրեն Խաչատուրովը ազգությամբ հայ, բայց ՌԴ-ի քաղաքացի է։ Նա աշխատել է Ռուսաստանի ոչ պետական հիմնարկում, որը ունեցել է շինարարական թույլտվություններ տալու և վերահսկողություններ իրականացնելու գործառույթներ, այն տարածքում, որտեղ ադրբեջանցի Թելման Իսմայիլովը և իր եղբայրն ունեցել են իրենց շուկան։ Խաչատուրովն իր գործունեության ընթացքում բազմաթիվ խախտումներ է հայտնաբերել, պատասխանատվության է ենթարկել Իսմաիլովի մտերիմներին, որի արդյունքում վերջինս խոստացել է հարուցել քրեական գործ և տարբեր հետապնդումներ նրա նկատմամբ, ընդհուպ մինչև հարձակում է կազմակերպել նրա կնոջ վրա, որի վերաբերյալ ՌԴ-ում հարուցվել է քրեական գործ։

«Այնուհետև Խաչատուրովը Ռուսաստանից տեղափոխվել է Հայաստան, որից հետո նրա նկատմամբ հետախուզում է հայտարարվել իբր կաշառքի միջնորդության փորձի վերաբերյալ։ Քանի որ նա չի եղել պետական չինովնիկ, նրա նկատմամբ հարուցել են գործ, ըստ որի՝ Խաչատուրովը ցանկացել է կաշառքի միջնորդ լինել, բայց երբ գումարը բերել են, նա չի գտնվել իր աշխատասենյակում։ Այս ձևակերպմամբ նրա նկատմամբ մեղադրանք է առաջադրվել։ Թեև նշվում է՝ Խաչատուրովը կաշառք է պահանջել Իսմայիլովի օգտին գործողություններ կատարելու համար, սակայն նա պնդում է, որ ճիշտ հակառակն է եղել»,- ասաց փաստաբանը ընդգծելով՝ ավելին, նա տեղեկացրել է համապատախան ծառայություններին, որ իր նկատմամբ նման փորձ են ուզում կատարել:

Բաղդասարյանի խոսքով՝ Խաչատուրովի նկատմամբ հետախուզում է հայտարարվել և պահանջել են, որպեսզի նրան հանձնեն ՌԴ-ին․ «Նա տառապում էր ծանր հիվանդությամբ և չէր կարողանում տեղաշարժվել, սակայն գրկած վիճակում բերում էին դատարան։ Որևէ բժշկական ստուգում չեն կատարել հասկանալու՝ արդյո՞ք Խաչատուրովն ի վիճակի է, որ տեղափոխեն ՌԴ։ Թեև մեր բժիշկները արգելել են դատարաններին դա անել, բայց ՌԴ-ից իրենք ստացել են նամակ, որտեղ ասվում է, որ ՌԴ դատախազությունը երաշխավորում է՝ տեղափոխումը կլինի նրա առողջության համար անվտանգ։ Դատարանները հաշվի չեն առել մեր բժիշկների մասնագիտական կարծիքները, փոխարենը հիմք են ընդունել ՌԴ-ի խոստումը»,- ասաց նա:

Փաստաբանը նշեց, որ նախապես դիմել էին ՄԻԵԴ, վերջինս արգելել է Խաչատուրովի հանձնումը Ռուսաստանին և այսօր միջազգային պայմանագրերի համաձայն նրան պետք է ազատեին, բայց չարեցին, ուստի ինքը երկուշաբթի օրը համապատասխան միջնորդությամբ հանդես կգա։ Ըստ նրա՝ Սուրեն Խաչատուրովի կալանքի առավելագույն ժամկետը լրանում է դեկտեմբերի 11-ին և «մեծ լավություն արած չեն լինի, եթե մի քանի օր առաջ ազատեն»։

Սոնա Հարությունյան