Մոուրինյուն ԲԿՄԱ-ի դեմ առաջիկա խաղում «Յունայթեդ»-ի մեկնարկային կազմում փոփոխություններ կանի

«Մանչեսթեր Յունայթեդ»-ի գլխավոր մարզիչ Ժոզե Մոուրինյոն Չեմպիոնների լիգայի խաղարկության խմբային փուլի վերջին տուրում Մոսկվայի ԲԿՄԱ-ի դեմ տնային խաղում թիմի մեկնարկային կազմում փոփոխություններ կանի: Անգլիական թիմի պաշտոնական կայքը, այս մասին Մոուրինյոն հայտնել է Չեմպիոնների լիգայի խաղին նախորդող մամուլի ասուլիսի ընթացքում:

Պորտուգալացի մասնագետը հաստատել է, որ թիմի մեկնարկային կազմի ֆուտբոլիստ, սերբ կիսապաշտպան Նեմանյա Մատիչը վնասվածքի պատճառով հանդիպմանը չի մասնակցի: «Մենք խնդիրներ ունենք, ունենք վնասվածք ստացած ֆուտբոլիստներ: Մատիչը վնասվածք ունի, և ես նրան չեմ ստիպելու խաղալ ԲԿՄԱ-ի դեմ: Մի քանի ֆուտբոլիստներ, ովքեր առավել հաճախ են խաղում, հանգստի կարիք ունեն: Եվ որ ավելի կարևոր է, կան տղաներ, ովքեր արժանի են խաղալու հնարավորություն ստանալ»,- ասել է Մոուրինյուն:

Նա նաև հայտնել է, որ ԲԿՄԱ-ի դեմ խաղին չի մասնակցի նաև շվեդ հարձակվող Զլատան Իբրահիմովիչը: Պորտուգալացի մասնագետը նշել է, որ Զլատանը վնասվածք չունի, սակայն նրան հանգիստ է անհրաժեշտ՝ ծունկը լիովին բուժելու համար:

Ավելի վաղ Մոուրինյուն հայտնել էր, որ Չեմպիոնների լիգայի առաջիկա խաղում մեկնարկային կազմում խաղադաշտ դուրս կգա դարպասապահ Սերխիո Ռոմերոն, իսկ թիմի հիմնական դարպասապահ Դավիթ դե Խեան «Արսենալ»-ի դեմ կայացած ծանր խաղից հետո հանգստանալու հնարավորություն կստանա: Իսպանացի դարպասապահը չի լինի թիմի հայտացուցակում:

Անգլիական թիմի մեկնարկային կազմում դաշտ դուրս կգա նաև ֆրանսիացի կիսապաշտպան Պոլ Պոգբան, ով «Արսենալ»-ի դեմ խաղում կարմիր քարտ էր ստացել և հեռացվել խաղադաշտից: «Իհարկե, «Արսենալ»-ի դեմ խաղից հետո նա մի փոքր հոգնած է, քանի որ դա իսկապես ծանր խաղ էր, իսկ դրանից հետո ԲԿՄԱ-ի դեմ խաղի համար վերականգնվելու համար մենք երկու օր ժամանակ ունենք, բայց նա ուրախ է, որ խաղալու է, քանի որ ցանկանում է պահպանել մարզավիճակը, որովհետև վնասվածքից ապաքինվելուց հետո ֆենոմենալ խաղ է ցուցադրում»,- նշել է Ժոզե Մոուրինյուն: