Լուսանկարներ. «Կրակե մարտահրավեր», Դիտեք, զգուշացեք ու հեռու մնացեք այսպիսի բաներից

Օրեր առաջ ԱՄՆ Հյուսիսային Կարոլինա նահանգում բնակվող մի յոթամյա տղա ինքն իրեն հրկիզել է և այրվածքներով տեղափոխվել հիվանդանոց։

Ռոնդարիուս Բարնհարդթը յութուբյան ամենատարօրինակ և ամենավտանգավոր թրենդներից մեկի՝ «Կրակե մարտահրավերի» զոհերից է։ Մարտահրավերի էությունն այն է, որ մասնակիցը պետք է որևէ դյուրավառ նյութ լցնի իր վրա և ինքնահրկիզվի։ Ու ամենակարևորն այն է, որ այդ ողջ ընթացքը պետք է տեսաձայնագրվի և ներբեռնվի Youtube, նախընտրելի է ուղիղ հեռարձակմամբ։

7-ամյա տղայի՝ Բարնդհարթի, մայրը պատմել է, որ իր որդին Youtube-ում դիտել է այդ մարտահրավերների տեսահոլովակներից և որոշել ինքն էլ մասնակցել դրան։ Նա նաև նշել է, որ իր մյուս որդին սկզբից նույնն արել է ձեռքի հետ, այսինքն՝ սկզբում այրել է ձեռքը, իսկ հետո եղբայրը՝ Բարնդհարդթը, որոշել է դյուրավառ նյութը լցնել իր շապիկի վրա և այրել այն։

Երեխաների մայրն այդ ժամանակ տանը չի եղել, փոխարենը տանն էր նրանց պապիկը։ Երբ նա տեսել է, թե ինչ են անում իր թոռները, միանգամից քայլեր է ձեռնարկել՝ մարելու հրդեհը, սակայն չի հաջողվել։ Հենց այդ ժամանակ 7-ամյա Ռոնդարիուսը իր վրայից պատռել է այրվող շապիկն ու փորձել դեն նետել, որի ընթացքում այն ընկել է իր դեմքին՝ առաջացնելով տարբեր աստիճանի այրվածքներ։

Ռոնդարիուսը հիմա գտնվում է հիվանդանոցում․ նրան երկար ժամանակ է պետք, որպեսզի լիովին վերականգնվի։ Իրենց որդու ցավալի դեպքը մատնանշելով՝ նրա ծնողները բոլորին կոչ են անում ավելի ուշադիր լինել իրենց երեխաների հանդեպ և ավելի հաճախ զրուցել նրանց հետ, որպեսզի երեխաները գիտակցեն այդ մարտահրավերների վտանգավորության աստիճանն ու հեռու մնան դրանցից։

«Կրակե մարտահրավերը» սկսեց տարածվել դեռ 2012 թվականին։ Մինչ այսօր բազմաթիվ երեխաներ են տուժել դրանից, և ցավոք, ոմանք անգամ մահացել են։ Վիճակագրությունը ցույց է տալիս, որ վերջին ժամանակաշրջանում աշխարհում կրկին լայն տարածում է գտել այդ չարաբաստիկ մարտահրավերը։ Դրա դեմ պայքարում են ոչ միայն ոստիկանները, այլ՝ բոլորը, սակայն, դժբախտաբար, երբեմն այն ավելի ուժեղ է գտնվում և իր ճանկերը գցում երեխաներին։