«Ադրբեջանն «ամենաազնիվն» է․ մնում է Հայաստանի իշխանություններն ադեկվատ արձագանքեն»

ԱՄՆ-ն ուզում է ցույց տալ աշխարհին, որ հարցն իր ուշադրության կենտրոնում է գտնվում։ Այս մասին ԼՈՒՐԵՐ․com-ի հետ զրույցում ասաց Մարդկային զարգացման միջազգային կենտրոնի ղեկավար Թևան Պողոսյանը՝ անդրադառնալով ԱՄՆ դեսպանատան հայտարարությանը, ըստ որի՝ վերջինս իր քաղաքացիներին կոչ է անում չայցելել Հայաստան և Արցախ՝ որպես պատճառ նշելով նաև սահմանային լարվածությունը։

«ԱՄՆ-ի շահերից բխում է այդպիսի հայտարարություն անել և ուշադրություն գրավել, որ իր նպատակներին հասնելու իմաստով այդ գործիքակազմի օգտագործմամբ ուշադրությունը բևեռի խնդրի վրա։ Փորձում է ցույց տալ, որ մտահոգ է իր քաղաքացիների անվտանգության համար, կամ օրեր առաջ եղած հեռախոսազրույցների ժամանակ հնարավոր է ինչ-որ բան են պայմանավորվել և սրանով փորձում է կողմերի ուշադրությունը հրավիրել, թե սպասում է նրանց պատասխաններին, կամ ցույց է տալիս աշխարհին, որ հարցն իր ուշադրության կենտրոնում է գտնվում և ինքն այստեղ շահեր ունի։ Սա դիվանագիտական գործիքակազմի երևույթներից մեկն է, որ տվյալ երկիրն իր շահերից ելնելով որոշել է օգտագործել»,- նշեց նա։ 

Հաշվի առնելով, որ 44-օրյա պատերազմից առաջ ևս նման հայտարարություն եղավ՝ արդյոք սա կարելի՞ է նախազգուշացում համարել և հնարավոր պատերազմի մասին վկայել, հարցին ի պատասխան Պողոսյանն ասաց․ «Իսկ պատերազմն ավարտվե՞լ է, ես չեմ հիշում, որ մենք ստորագրել ենք խաղաղության պայմանագիր, մենք հիմա էլ ենք գտնվում  պատերազմի մեջ, ինչպես 1994 թվականից ի վեր։ Ինչի մասին ես տեղյակ եմ, դա երկկողմ զինադադարներն են, որոնք եղել են գրավոր՝ մեկը 1994 թվականի մայիսի 12-ին, մյուսը՝ 2020-ի նոյեմբերի 10-ին։ Այնպես որ ասել՝ պատերազմը ավարտվել է կամ կսկսի՝ սխալ է։ Ինչ վերաբերում է ակտիվ մարտական գործողություններին, ապա այն սկսվել է մայիսի 12-ից, Ադրբեջանի 200 զինյալ ուժեր ներխուժել են մեր տարածք դա ռազմական գործողություն չէ՞»,- ասաց Պողոսյանը։ 

Անդրադառնալով այն հանգամանքին, որ այսօր ադրբեջանական կողմը չի ներկայացել բանակցությունների՝ Պողոսյանը նկատեց, որ Ադրբեջանը համարում է, որ ինքն այլևս բանակցությունների խնդիր չունի․ «Ադրբեջանը երբեք գաղտնի չի պահել իր ցանկությունները, մեկ անգամ չի ասել, որ Զանգեզուրը, Սևանն ու Երևանն էլ իրենն է համարում։ Այնպես որ այսքանի մեջ Ադրբեջանն «ամենաազնիվն» է, հարցը մնում է այն, թե Հայաստանի իշխանությունները կարողանալո՞ւ են ադեկվատ արձագանքել մեր առջև ծառացած մարտահրավերներին, թե ոչ։ ՀՀ-ն ունի պետական սահմանի մասին օրենք, ԶՈՒ-երի մասին օրենք, ունի Սահմանադրություն, պետք է հասկանանք այդ ամեն ինչի մեջ Հայաստանն իր օրենքները կատարո՞ւմ է։ Եթե կան սահմանախախտներ, ապա նրանց պետք է չեզոքացնել, ձերբակալել կամ ոչնչացնել։ Մայիսի 12-ից այս կողմ ոչինչ չի արվել, նստել բանակցում են ահաբեկիչների ու դիվերսանտների հետ։ Այս ամենը հաշվի առնելով՝ պետք է հասկանալ՝ ինչ է պետք անել երկրի համար»,- նշեց նա։

Ըստ Պողոսյանի՝ ստեղծված իրավիճակից ելքը միայն իշխանությունների հեռանալն է, ինչը բխում է ՀՀ շահերից․ «Պետք է գիտակցեն և օր առաջ հեռանան, որ ապագա  սերունդների համար այսօր չկայացնեն որոշում, որից հետո ավելի է դժվարանալու մեր ազգի հին երազանքները կյանքի կոչելը։ Որքան վնասել են բավ է, պետք է գիտակցաբար հասկանան և հեռանան, որ նոր աղետներ չբերեն, որ Հայաստանի Հանրապետությունը գոնե լինի»,- եզրափակեց Պողոսյանը։ 

Սոնա Հարությունյան