Ի՞նչ կապ ունի ՔԿ-ի հրապարակած զենք, զինամթերքը Որոտանի գյուղապետի մեղադրանքի հետ

Ինչպես հայտնի է, այսօր վաղ առավոտյան իրավապահները խուզարկել են Որոտանի գյուղապետի տունը, այնուհետև գյուղապետարանը. այն ավարտելուց հետո Սուրիկ Օհաջանյանին բերման են ենթարկել: 

Քիչ առաջ ՔԿ-ն հաղորդագրություն տարածեց, ըստ որի, ՀՀ քրեական օրենսգրքի 154-րդ հոդվածի 2-րդ մասով նախատեսված հանցագործություն կատարելու կասկածանքով է (վարչական իրավախախտումների վերաբերյալ հոդվածով) ձերբակալվել Որոտանի գյուղապետը: Նրա տանը կատարած խուզարկության արդյունքում իրավապահները գտել էին զենք, զինամթերք, որոնց օրինականությունը դեռ պարզվում է, ինչպես նշված է ՔԿ տարածած հաղորդագրության մեջ:

Սակայն, չգիտես ինչու, ՔԿ-ն որոշեց հաղորդագրություն տարածել հենց գյուղապետի տանը հայտնաբերված զենք, զինամթերքի լուսանկարներով «Որոտանի գյուղապետը ձերբակալվել է» վերնագրով, այն դեպքում, երբ Սուրիկ Օհանջանյանին մեղադրանք է առաջադրվել բոլորովին այլ հոդվածով, այն է՝ Որոտանի բնակիչներին սոցիալական օգնություն առաջարկելու՝ «Հայաստան» դաշինքի օգտին քվեարկելու համար: 

Այս թեմայով մեկնաբանություն ստանալու նպատակով ԼՈՒՐԵՐ.com-ը կապ հաստատեց ՔԿ մամուլի քարտուղար Վարդան Թադևոսյանի հետ, որն ասաց, տանից դա են գտել, այդ լուսանկարով են տարածել հաղորդագրությունը. «Այդ կերպ ցանկացել ենք ասել, որ իրենք խուզարկություն են իրականացրել, այլ մասով, բայց գտել են նաև զենք, զինամթերք: Այդ զենքերը հնարավոր չէ՝ օրինական լինեն»,- ասաց Վարդան Թադևոսյանը, այն դեպքում, երբ իրենց տեքստում գրել էին, որ դրանց ձեռքբերման և պահելու օրինականությունը ստուգվում է:

Մեր դիտարկմանը, թե այդ վերնագրով և լուսանկարով հասարակության մոտ թյուր կարծիք է ձևավորվում, թե գյուղապետին բերման են ենթարկել հենց ապօրինի զենք, զինամթերք ունենալու կասկածանքով, ՔԿ մամուլի քարտուղարը պատասխանեց. «Բա ի՞նչ անեինք կաշառքի լուսանկարներով տայի՞նք հաղորդագրությունը: Եթե տեքստում չլիներ զենք, զինամթերքի մասին, ապա այդ լուսանկարը չէինք դնի: Պարտադիր չէ, որ լուսանկարը համապատասխանի տեքստին»,- նշեց Վարդան Թադևոսյանը: