Հնարավո՞ր է՝ զինծառայողը երկու ընտրատեղամասից քվեարկած լինի. Տիգրան Մուկուչյանը պարզաբանեց

Հնարավո՞ր է՝ զինծառայողները երկու ընտրական ցուցակում ընդգրկված լինեն և երկու ընտրատեղամասից քվեարկած լինեն։ Այս մասին ԿԸՀ նախագահից հետաքրքրվեց ՍԴ դատավոր Երվանդ Խունդկարյանը։

Տիգրան Մուկուչյանը պատասխանեց. «Ընդհանուր մեխանիզմն այնպիսին է, որ եթե ընտրողը որևէ ցուցակում ընդգրկվում է, ապա միանշանակ պետք է հանվի մյուս ցուցակից։ Չունենալով որևէ կոնկրետ փաստ, եթե դա հնարավոր է համարվում, նշանակում է մեղադրանք ինչ-որ մեկին։ Զինծառայողների ցուցակներում ընդգրկված են եղել ժամկետային զինծառայողներ»,-ասաց ԿԸՀ նախագահը։

Երվանդ Խունդկարյանը նաև հետաքրքրվեց՝ արդյոք ԿԸՀ-ն նկատե՞լ է միտում, որ ամեն ինչ արվի ՀՀ-ում հաշվառում չունեցող ՀՀ քաղաքացիների քվեարկությունը խոչընդոտելու համար։

ԿԸՀ նախագահի խոսքով՝ մեխանիզմներն ամրագրված են Ընտրական օրենսգրքով և եթե ցուցակների հետ կապված դիմումներ կամ բողոքներ լինեին, դրանք լիազոր մարմնին պետք է ներկայացվեին և այդ կապակցությամբ տեղեկատվություն ԿԸՀ-ում չի հավաքագրվում։

«Ինչ վերաբերում է ՀՀ քաղաքացի հանդիսացող անձանց, որոնք ՀՀ-ում հաշվառում չունեն, ապա նրանց համար ԸՕ-ն նույնպես հնարավոր է համարում դիմում ներկայացնելով ընդգրկվել համապատասխան ցուցակում և մասնակցել քվեարկությանը»,-նշեց Տիգրան Մուկուչյանը։