Պատգամավորները ԵՄ դեսպանի հետ հանդիպմանը բարձր են գնահատել Եվրամիության առաքելության գործունեությունը

Դուք Հայաստանում եք մեզ համար դժվարին ժամանակներում. Հայաստանը կանգնած է լուրջ մարտահրավերների առջև: Ինչպես հայտնում են ԱԺ-ից՝ այս մասին ասել է ՀՀ ԱԺ եվրոպական ինտեգրման հարցերի մշտական հանձնաժողովի նախագահ Արման Եղոյանը՝ ողջունելով ՀՀ-ում ԵՄ պատվիրակության նորանշանակ ղեկավար Վասիլիս Մարագոսին:

Հանդիպումը, որին մասնակցել են նաև ԵՄ պատվիրակության ղեկավարի տեղակալ Յան Պլեշինգերը, ԵՄ առաքելության ղեկավարի տեղակալ Մարեկ Կուբերսկին, Եվրոպական ինտեգրման հարցերի մշտական հանձնաժողովի նախագահի տեղակալ Մերի Գալստյանը, հանձնաժողովի անդամներ Սոնա Ղազարյանը, Արսեն Թորոսյանը և Տաթևիկ Գասպարյանը, տեղի է ունեցել սեպտեմբերի 26-ին:

Վասիլիս Մարագոսը, շնորհակալություն հայտնելով պատգամավորներին ջերմ ընդունելության համար, ներկայացրել է Եվրոպական միության ձեռնարկած քայլերը՝ Լեռնային Ղարաբաղից տեղահանված հայ բնակիչների կարիքները հոգալու համար: Պատվիրակության ղեկավարը նշել է, որ այս նպատակով արդեն իսկ որոշում կա տրամադրելու 5 միլիոն եվրո:

Արման Եղոյանը կարևոր է համարել Եվրոպական միության կողմից եկող աջակցությունը Հայաստանին այս բարդ ժամանակաշրջանում՝ միաժամանակ ընդգծելով հետագա ներդրումների, ծրագրերի ընդլայնման կարևորությունը, ինչին կարող են նպաստել ԵՄ պատվիրակության և Ազգային ժողովի ներկայացուցիչների պարբերական հանդիպումները:

Պատգամավորները բարձր են գնահատել ԵՄ առաքելության գործունեությունը: Հայաստանի տարբեր քաղաքներում նոր կենտրոնների բացումը, ըստ նրանց, թույլ կտա առավել մանրամասն տեղեկատվություն ուղարկելու Բրյուսել՝ հայ-ադրբեջանական սահմանին տիրող իրավիճակի վերաբերյալ:

Զրույցի առանցքային թեմաներից են եղել Համապարփակ և ընդլայնված գործընկերության համաձայնագրի կիրարկման արագացման հարցերը, առաջարկ է հնչել ճանապարհային քարտեզն առկա մարտահրավերներին համապատասխան փոփոխությունների ենթարկել:

Վասիլիս Մարագոսը ներկայացրել է առաջիկայում իրականացվելիք ծրագրերի առաջնահերթությունները, իր տեսլականն առկա խնդիրների վերաբերյալ: Ձեռք են բերվել մի շարք պայմանավորվածություններ համատեղ աշխատանքներն առավել կառուցողական շարունակելու համար: