Գուրգեն Մելիքյանը խոսքի կեսից արտասվեց ու կախեց լսափողը. «Հրապարակ»

Արցախից հայերի զանգվածային տեղահանություն թուրքն իր լավագույն երազում անգամ չէր կարող տեսնել, մենք այսօր տեսնում ենք։ ԵՊՀ պրոֆեսոր, Արցախյան բանակի գնդապետ Գուրգեն Մելիքյանը, որ միշտ ասում էր՝ հողը պետք է պահել այնտեղ ապրելով ու արարելով, «Հրապարակ»-ի հարցերին այսօր ուղղակի չէր կարողանում պատասխանել, ասաց՝ սիրտ չունեմ․ 

 «Հիմա պետք է Անդրանիկի նման անենք՝ ամեն մի հայի կարողանանք պահել, որ վաղը Արցախը նորից փրկենք։ Անդրանիկը 1 ոսկի էր տալիս 1 երեխայի համար, երեխայի փրկության համար»,- պրոֆեսորը հազիվ արտաբերեց այս բառերն ու կախեց լսափողը։

Արցախից բռնի տեղահանված հայերի թիվն այսօր հատեց 13 հազարի շեմը, մենք էլ ուրախանում ենք եկողների թվերով, սակայն իրականում դա ողբի պատճառ է՝ երկիր ենք դատարկում, թողնում թշնամուն։ Ադրբեջանական վայրագություններն, իհարկե, Ադրբեջան պետության հայեցողությանը թողնված արցախցի հայերին այլ ընտրություն չի թողել, որովհետեւ առանց Հայաստանի եւ Ռուսաստանի աջակցության փոքրիկ Արցախը չէր կարող դիմադրել թուրք-ադրբեջանական հրոսակներին, բայց հայրենի հողը լքելը կարող է նաեւ անդառնալի լինել։