Թիվ 1 ընտրատարածքում մտնում են բնակարաններ, փորձում են ստուգել՝ ովքեր ում են ընտրելու. Ստեփան Սաֆարյան

Լուրեր.com-ի զրուցակիցն է թիվ 1 ընտրատարածքի պատգամավորության թեկնածու Ստեփան Սաֆարյանը։

-Պարո՛ն Սաֆարյան, արդեն քանի օր է՝ դուք հանդիպում եք բնակիչների հետ։ Նրանց մեջ հավատ նկատո՞ւմ եք արդար, թափանցիկ ընտրությունների հանդեպ։

-Ո՛չ, ընտրությունների հանդեպ հավատը չափազանց ցածր է, վստահության մակարդակն անպատկերացնելի է, բայց, այդուհանդերձ, տեսնելով, թե ինչպես են ընդունում բուկլետներն, ինչպես են ինքնաբուխ զորակցում և ողջունում իմ թեկնածությունը, վստահ եմ՝ այդ մարդիկ կքվեարկեն։ Այլ բան է, որ այդ մարդիկ չեն հավատում, որ պետությունն արդար և թափանցիկ ընտրություններ կկազմակերպի։ Եվ ընդհանրապես, նրանք տեսնում են այդ անհավասարությունը թեկնածուների միջև։ Ազատ և արդար ընտրությունը միայն քվեատուփ լցոնել-չլցոնելը չէ։ Դա նաև թեկնածուների միջև հավասար պայամաններն են։ Մարդիկ տեսնում են, որ մի ամբողջ պետական մեքենա ուղղակի  փորձում է կերտել նոր պատգամավոր և նաև պարտադրել այդ թեկնածությունը։

Մարդիկ տեսնում են այդ անհավասարությունը թեկնածուների միջև, դա նշանակում է, որ չեն վստահում։

-Ընտրակաշառքի բաժանման դեպքեր գրանցվե՞լ են։

-Ո՛չ։ Գիտենք, որ տներ են մտնում, այսօր էլ ասացին, որ մարդիկ մտնում են բնակարաններ, փորձում են ստուգել՝ ովքեր ում են ընտրելու։ Գիտենք, որ նրանց ոմանք դուրս են շպրտում կամ մերժում են, բայց ընդհանուր առմամբ այս ամենը մտահոգության տեղիք է տալիս։ Իմ մոտ այն տպավորությունն է, որ իրենք էլ չեն հասկանում թե ինչ տպավորություն են ստեղծում հասարակության մեջ, երբ փորձում են նման մեթոդներով ճշտել ընտրողների նախապատվությունները։

-Բազմիցս նշել եք, որ կա վարչական ռեսուրսի չարաշահում, մի ամբողջ պետական մեքենա սատարում է Հանրապետական թեկնածուին։ Այս ամենի հետ մեկտեղ, ինչպե՞ս եք գնահատում Ձեր շանսերը։

-Շանսերս բարձր եմ գնահատում։ Դա տեսանելի է իմ հանդիպումների ընթացքում։ Ինձ համար որևէ մեկը ոչինչ չի կազմակերպում։ Միայն այն, որ մարդիկ ինքնաբուխ իրենց զորակցությունն են հայտնում, քարոզիչները բնակարաններում ջերմ ընդունելության են արժանանում, սա նշանակում է, որ մարդիկ գնահատում են և նաև նախապատվություն են տալիս իմ թեկնածությանը։

Թե որքան տոկոս կկազմի դա, ես դեռ ասել չեմ կարող, որովհետև դա մի քանի գործոններից է կախված, օրինակ, թե ինչպիսի վիճակներում են ընտրացուցակները, որոնք այս պահին ես պահանջում եմ ստանալ։

Ես փորձելու եմ այդ ամենը ճիշտ գնահատել։ Միամիտ չէինք, որ չհասկանայինք, որ իշխանությունն այս ամենին դիմելու է։

-Պարո՛ն Սաֆարյան, կուսակցություններից, հ/կ-ներից Ձեզ սատարելու մասին առաջարկներ ստացե՞լ եք։

-Դեռ ո՛չ, բայց առաջիկա օրերին, երևի թե կստանամ։