ՆԱՏՕ-ն համաձայնել է Թուրքիային ՀՕՊ Patriot համակարգեր մատակարարել

ՆԱՏՕ-ի մասնակից երկրները նոյեմբերի 20-ին բավարարել են Թուրքիայի հայցը այս երկիր ժամանակակից հակաօդային պաշտպանության Patriot համակարգերի մատակարարման մասին. հաղորդում է Reuters-ը:

Ավելի վաղ Անկարան պաշտոնապես խնդրել էր ՆԱՏՕ-ին տեղակայել այդ համակարգերը Սիրիայի հետ սահմանին: Միևնույն ժամանակ, Թուրքիան հայտարարել էր, որ ինքը ցանկանում է պաշտպանությունը ստանալ Սիրիայի ավիացիայից, որը վերջին ամիսների ընթացքում անընդհատ ռմբակոծում է ապստամբների դիրքերը Սիրիայի հյուսիսում:

Ներկայումս մարտունակ հակաօդային Patriot համակարգեր ունի ընդամենը երեք երկիր՝ ԱՄՆ-ը, Գերմանիան և Նիդեռլանդները: Բեռլինն արդեն հայտարարել է, որ քննարկում է իր համակարգերի՝ Թուրքիային տրամադրելու հնարավորությունները՝ ի նշան Անկարայի հետ համաձայնության:

ՆԱՏՕ-ի գլխավոր քարտուղար Անդերս Ֆոգ Ռասմուսենն արդեն հայտարարել է, որ Թուրքիայում ՀՕՊ համակարգերը կօգտագործվեն հարակից տարածքներից Թուրքիայի տարածք ընկնող հրթիռներից պաշտպանվելու համար: Նրա խոսքերով՝ ՆԱՏՕ-ն Սիրիայում անթռիչք գոտի չի ստեղծի: Եթե այս դիրքորոշումն ինչ-ինչ պատճառներով փոփոխությունների ենթարկվի, Թուրքիան կկարողանա ոչնչացնել ցանկացած ինքնաթիռ և ուղղաթիռներ Սիրիայի տարածքի զգալի մասում: Patriot համակարգը կարող է հայտնաբերել և ոչնչացնել օդային թիրախներ ավելի քան հարյուր կիլոմետր հեռավորության վրա: