Հայաստանը պատվավոր հյուրի կարգավիճակով՝ իտալական ցուցահանդեսում

Ս. թ. նոյեմբերի 15-18-ը Իտալիայի Սալերնո նահանգի Պեստում քաղաքում բացվել է «Միջերկրականի հնագիտական զբոսաշրջություն» խորագիրը կրող 15-րդ միջազգային ցուցահանդես-տոնավաճառը, որին մասնակցում էին շուրջ 4 տասնյակ երկրներ: Ցուցահանդեսին Հայաստանը ներկայացել է պատվավոր հյուրի կարգավիճակով:

Հայկական տաղավարը ձևավորված էր Զվարթնոցի Սբ. Գրիգոր տաճարի հորինվածքային լուծմամբ:

Նոյեմբերի 15-ին՝ բացման հանդիսավոր արարողությանը ներկա էին Սալերնոյի նահանգապետը, Պեստումի քաղաքապետը, Իտալիայի ՅՈՒՆԵՍԿՕ-ի ներկայացուցիչը և այլ պաշտոնատար անձինք: Ողջույնի խոսքով հանդես են եկել Իտալիայի մշակույթի, զբոսաշրջության պատասխանատուները, ՀՀ մշակույթի նախարարի տեղակալ Արև Սամուելյանը:

Նոյեմբերի 15-ին տեղի է ունեցել «Հայաստանը Նոյի երկիր» գիտական նիստը, որը վարում էր պատմագիտական և հնագիտական գիտաժողովների կազմակերպիչ Մարկո Մերոլանը: Նիստին մասնակցել են Հայաստանում շուրջ տասը տարի հնագիտական հետազոտություններ իրականացրած մասնագետներ՝ Ռաֆայելե Բիշոնեն և Նեդա Պարմեջիանին: Զեկուցումներով հանդես են եկել նաև ՀՀ մշակույթի նախարարության «Պատմամշակութային ժառանգության գիտահետազոտական կենտրոնի» տնօրեն, հնագետ Հակոբ Սիմոնյանը և ՀՀ մշակույթի նախարարության «Պատմամշակութային արգելոց-թանգարանների և պատմական միջավայրի պահպանության ծառայության» տնօրենի գիտական աշխատանքների գծով տեղակալ, հնագետ Աշոտ Փիլիպոսյանը: