«ՉուխաջյանՖեստ» փառատոնը՝ Տիգրան Չուխաջյանի 175-ամյա հոբելյանին

ՀՀ նախագահ Սերժ Սարգսյանի հովանու ներքո, ՀՀ մշակույթի նախարարության աջակցությամբ, Հայաստանի պետական երիտասարդական նվագախումբը և Հայաստանի կոմպոզիտորների և երաժշտագետների միությունը 2010 թվականից անցկացնում են հայ կոմպոզիտորական արվեստի փառատոն:

Փառատոնի նպատակն է սերունդների միջև ամուր կապի ստեղծումը, հայ կոմպոզիտորական դպրոցի՝ ապագա սերունդների համար ստեղծած ժառանգության արժևորումը և այդ գործընթացի շարունակականության ապահովումը: Փառատոնը միտված է նաև հայ կոմպոզիտորական դպրոցի նվաճումների հանրահռչակմանը:

Հայ կոմպոզիտորական արվեստի փառատոնը յուրաքանչյուր տարի կրում է այն մեծերի անուններն, ում հոբելյանը նշվում է տվյալ տարի: Հայ կոմպոզիտորական արվեստի փառատոնը 2010 թ. կոչվել է «ՍարյանՖեստ», այն նվիրված էր Խորհրդային Միության և Հայաստանի ժողովրդական արտիստ, պետական մրցանակի դափնեկիր, հասարակական գործիչ և մանկավարժ, հայ անվանի կոմպոզիտոր Ղազարոս Սարյանի 90-ամյա հոբելյանին: Փառատոնի բացման հանդիսավոր արարողությունը տեղի է ունեցել դեկտեմբերի 11-ին, Արամ Խաչատրյան համերգասրահում: Առաջին համերգն ամբողջությամբ նվիրված էր Ղ. Սարյանի երաժշտությանը: Փառատոնի շրջանակներում դեկտեմբերի 12-ին, նույն համերգասրահում տեղի է ունեցել Ռոբերտ Ամիրխանյանի հեղինակային երեկոն և ձայնասկավառակի շնորհանդեսը: Փառատոնի եզրափակիչ 2 համերգները կայացել են դեկտեմբերի 14-ին՝ Կոմիտասի անվ. կամերային երաժշտության տանը, և դեկտեմբերի 16-ին՝ Արամ Խաչատրյան համերգասրահում: Հայ կոմպոզիտորական արվեստի փառատոնի 2-րդ համերգաշարը /ներառում է 4 համերգ/ մեկնարկել է 2011 թվականի մայիսի 17-ին, Կոմիտասի անվան կամերային երաժշտության տանը: Փառատոնի շրջանակներում կատարվել են Ռոբերտ Ամիրխանյանի, Աշոտ Զոհրաբյանի, Վարդան Աճեմյանի, Էդգար Հովհաննիսյանի, Դավիթ Հալաջյանի, Երվանդ Երկանյանի, Սուսաննա Հովհաննիսյանի, Սոֆի Ազնաուրյանի, Սիմոն Հովհաննիսյանի, Սոֆյա Միքայելյանի, Արզաս Ոսկանյանի, Կարեն Անանյանի, Աննա Գարսոյանի, Մարտին Ուլիխանյանի, Էդուարդ Սադոյանի, Վահրամ Բաբայանի, Խաչատուր Մարտիրոսյանի, Վարդ Մանուկյանի, Արմենուհի Կարապետյանի և Աշոտ Ղազարյանի ստեղծագործությունները:

2011 թվականի նոյեմբերի 21-ից դեկտեմբերի 19-ը Երևանում անցկացվել է Հայ կոմպոզիտորական արվեստի «ԲաբաջանյանՖեստ» փառատոնը՝ նվիրված հայ մեծանուն կոմպոզիտոր Առնո Բաբաջանյանի ծննդյան 90-ամյակին: Փառատոնի շրջանակներում նախատեսված 6 համերգի ընթացքում հնչել են ոչ միայն Ա. Բաբաջանյանի, այլև ժամանակակից կոմպոզիտորների ստեղծագործություններ:

2012 թ. հայ կոմպոզիտորական արվեստի փառատոնը նվիրվում է Հայաստանի կոմպոզիտորների և երաժշտագետների միության 80-ամյա և Տիգրան Չուխաջյանի 175-ամյա հոբելյաններին՝ կրելով «ՉուխաջյանՖեստ» անվանումը:

«ՉուխաջյանՖեստ» փառատոնը մեկնարկում է ս. թ. նոյեմբերի 21-ին, Արամ Խաչատրյան համերգասրահում և կշարունակվի մինչև դեկտեմբերի 19-ը /գալա համերգ/: Փառատոնի շրջանակում կիրականացվի 8 համերգ: Համերգաշրջանի ընթացքում կհնչեն Տիգրան Չուխաջյանի, Առնո Բաբաջանյանի, Արամ Խաչատրյանի, Էդվարդ Միրզոյանի, Ադամ Խուդոյանի, Էդուարդ Հայրապետյանի, Սուրեն Զաքարյանի, Ալեքսանդր Սպենդիարյանի, Սիմոն Հովհաննիսյանի, Աշոտ Բաբայանի, Դավիթ Բալասանյանի, Վարդ Մանուկյանի, Մարտուն Իսրայելյանի, Ստեփան Շաքարյանի, Սվետլանա Ալեքսանյանի, Վահրամ Բաբայանի, Կարեն Անանյանի, Արմեն Պողոսյանի, Հովհաննես Մանուկյանի, Դավիթ Գիլանյանի, Վարդան Աճեմյանի, Ռուբեն Ալթունյանի, Արթուր Ահարոնյանի, Արմեն Սմբատյանի, Էդուարդ Բաղդասարյանի, Ջոն Տեր-Թադևոսյանի ստեղծագործությունները:

Փառատոնի ավարտին լույս կտեսնի ձեռնարկ, որում տեղ կգտնեն տարբեր երաժշտագետների կարծիքներ՝ կատարված ստեղծագործությունների վերաբերյալ:

Ս. թ. նոյեմբերի 20-ին, ժամը 13:00-ին, ՀՀ մշակույթի նախարարությունում՝ «ՉուխաջյանՖեստ» փառատոնին նվիրված մամուլի ասուլիսին մասնակցում էին ՀՀ մշակույթի նախարար Հ. Պողոսյանը, Հայաստանի կոմպոզիտորների և երաժշտագետների միության նախագահ Ռ. Ամիրխանյանը, Ալ. Սպենդիարյանի անվան օպերայի և բալետի ազգային ակադեմիական թատրոնի սիմֆոնիկ նվագախմբի գլխավոր դիրիժոր Կարեն Դուրգարյանը, Հայաստանի պետական երիտասարդական նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը: