Նախատեսվում է ստեղծել ՀՀ կապի և հեռուստահեռարձակման արբանյակ

Հայաստանի Հանրապետության տրանսպորտի եւ կապի նախարար Գագիկ Բեգլարյանը նոյեմբերի 20-ին ընդունել է իր հրավերով Հայաստանում գտնվող «MDA տեղեկատվական համակարգեր» ընկերության նախագահ Մագ Իսքանդերին: «MDA տեղեկատվական համակարգեր» ընկերությունը հանդիսանում է տեղեկատվական համակարգերի, այդ թվում նաև տիեզերական արբանյակների բարձր որակավորում ունեցող կազմակերպություն, որն առաջարկում է առաջատար լուծումներ տեղեկատվական արտադրության ոլորտում:

Հանդիպման ընթացքում ՀՀ տրանսպորտի և կապի նախարարը ներկայացրել է Հայաստանի Հանրապետության տիեզերական ծրագիրը, համաձայն որի նախատեսվում է ստեղծել Հայաստանի Հանրապետության կապի և հեռուստահեռարձակման արբանյակ: Նախարարը տեղեկացրել է, որ ներկայումս իրականացվում է արբանյակի տեղակայման ուղեծրային դիրքի հաճախականությունների ռեսուրսի ընդլայնման հնարավորությունների ուսումնասիրությունը: Նշվել է նաև, որ Հայաստանի Հանրապետությունը արդեն իսկ Հեռահաղորդակցության միջազգային միություն է ներկայացրել ուղեծրային դիրքի Հայաստանի կողմից ամրագրման դիմումային փաստաթղթերը:

«MDA տեղեկատվական համակարգեր» ընկերության նախագահ Մագ Իսքանդերը իր շահագրգռվածությունն է հայտնել Հայաստանի Հանրապետության տիեզերական ծրագրում բազմակողմանի մասնակցություն ցուցաբերելու հարցում: Մասնավորապես նշվել է, որ ընկերությունը կարող է մասնակցություն ցուցաբերել ծրագրի բոլոր փուլերում, այդ թվում նաև հնարավոր ֆինանսավորման լուծումներ գտնելու հարցում:

ՀՀ տրանսպորտի եւ կապի նախարար Գագիկ Բեգլարյանը և կանադական «MDA տեղեկատվական համակարգեր» ընկերության նախագահ Մագ Իսքանդերը պայմանավորվել են շարունակել հետագա համագործակցության զարգացման աշխատանքները և մոտ ապագայում կազմակերպել մասնագետների հանդիպում՝ ՀՀ տիեզերական ծրագրի իրականացման գործնական քայլեր մշակելու համար:

Մագ Իսքանդերը շնորհակալություն է հայտնել ընդունելության համար, եւ նախարարին պատասխան այցով հրավիրել Կանադա: