Դատախազը միջնորդել է մեղավոր ճանաչել եւ դատապարտել ազատազրկման

«Հայաստանի ազգային գրադարան»-ից եւ Երեւանի պետական համալսարանի «Սարգիս եւ Մարի Իզմիրյանների» անվան գիտական գրադարանից գողություն կատարելու քրեական գործով դատաքննության ընթացքում, մեղադրանքը պաշտպանող դատախազի գնահատմամբ, հիմնավորվել է թվով 7 ամբաստանյալներին առաջադրված մեղադրանքը: Երեւան քաղաքի Կենտրոն եւ Նորք-Մարաշ վարչական շրջանների ընդհանուր իրավասության առաջին ատյանի դատարանում այսօր տեղի ունեցած նիստում դատախազը միջնորդել է 7 անձանց մեղավոր ճանաչել եւ դատապարտել ազատազրկման: Մասնավորապես՝ դատախազը միջնորդել է ամբաստանյալ Վ. Ազարիաշվիլուն մեղավոր ճանաչել ՀՀ քրեական օրենսգրքի 177-րդ հոդվածի 3-րդ մասի 1-ին կետով, 34-177-րդ հոդվածի 3-րդ մասի 1-ին կետով եւ 38-179-րդ հոդվածի 3-րդ մասի 1-ին կետով եւ ՀՀ քրեական օրենսգրքի 66-րդ հոդվածի կանոններով վերջինիս դատապարտել ազատազրկման՝ 11 տարի ժամկետով՝ անձնական գույքի երեք քառորդ մասի բռնագրավմամբ,

Ե. Ղամբարյանին՝ ՀՀ քրեական օրենսգրքի 177-րդ հոդվածի 3-րդ մասի 1-ին կետով եւ դատապարտել ազատազրկման՝ 6 տարի ժամկետով՝ անձնական գույքի երկու երրորդ մասի բռնագրավմամբ,

Հ. Դուրգարյանին՝ ՀՀ քրեական օրենսգրքի 179-րդ հոդվածի 3-րդ մասի 1-ին կետով եւ դատապարտել ազատազրկման՝ 6 տարի ժամկետով՝ անձնական գույքի երկու երրորդ մասի բռնագրավմամբ,

Կ. Հովհաննիսյանին՝ ՀՀ քրեական օրենսգրքի 34-177-րդ հոդվածի 3-րդ մասի 1-ին կետով եւ դատապարտել ազատազրկման՝ 5 տարի ժամկետով՝ առանց գույքի բռնագրավման,

Վ. Եղիազարյանին՝ ՀՀ քրեական օրենսգրքի 34-177-րդ հոդվածի 3-րդ մասի 1-ին կետով եւ դատապարտել ազատազրկման 4 տարի 6 ամիս ժամկետով՝ առանց գույքի բռնագրավման,

Դ. Ղամբարյանին՝ ՀՀ քրեական օրենսգրքի 38-34-177-րդ հոդվածի 3-րդ մասի 1-ին կետով եւ դատապարտել ազատազրկման 5 տարի 6 ամիս ժամկետով՝ առանց գույքի բռնագրավման,

Ա. Հովսեփյանին՝ ՀՀ քրեական օրենսգրքի 315-րդ հոդվածի 1-ին մասով եւ նրան դատապարտել կալանքի՝ 2 ամիս ժամկետով:

Բացի այդ, դատախազը միջնորդել է նաեւ Հայաստանի Ազգային գրադարանի և Երևանի պետական համալսարանի կողմից ներկայացված քաղաքացիական հայցերը բավարարել ամբողջությամբ:

Նկատի ունենալով, որ սույն քրեական գործից անջատվել է «Հայաստանի Ազգային գրադարանե ՊՈԱԿ-ի գրապահոցից եւ Երևանի պետական համալսարանի գրադարանից առանձնապես խոշոր չափերի գրքերի գողություն կատարած ոմն Վլադ Տրուբիցինի եւ մյուս անհայտ անձանց վերաբերյալ մասը՝ ուստի դատախազն անհրաժեշտ է համարել սույն գործով իրեղեն ապացույցներ ճանաչված իրերը, առարկաները, փաստաթղթերը եւ գրքերը պահել քրեական գործի հետ և չոչնչացնել: